Kosova intensifikon përgatitjet para sfidës me Izraelin, optimizëm në radhët e “Dardanëve”

Kombëtarja e Kosovës në futboll ka zhvilluar sot seancën e tretë stërvitore në kuadër të përgatitjeve për përballjen e ardhshme kundër Izraelit. Nën urdhrat e përzgjedhësit Franco Foda, lojtarët po vijojnë punën me intensitet të lartë për të qenë sa më të gatshëm për këtë duel. Federata e Futbollit të Kosovës ka publikuar pamje nga seanca e sotme, ku vihet re një frymë pozitive dhe përkushtim maksimal nga ana e futbollistëve, të cilët shfaqen mjaft të motivuar në prag të kësaj ndeshjeje. Pas përfundimit të stërvitjes, futbollistët Lindrit Kamberi dhe Milot Avdyli kanë ndarë përshtypjet e tyre, duke u shprehur të kënaqur me rrjedhën e përgatitjeve. Ata kanë shprehur bindjen se skuadra do të arrijë një rezultat pozitiv në takimin e së shtunës. “Dardanët” janë të përqendruar maksimalisht në këto dy ndeshje të fundit të vitit, duke synuar që me besim dhe angazhim të plotë të përfaqësojnë sa më mirë ngjyrat e Kosovës në fushën e blertë.