Arrestohen drejtori dhe menaxheri i një kompanie, dyshohen për keqpërdorimin e mbi 62 mijë eurove nga grantet ndërkombëtare

Dy persona janë arrestuar sot, më 11 nëntor 2026, nën dyshimin për përfshirje në veprën penale “Mashtrimi lidhur me pranimin e fondeve nga komuniteti ndërkombëtar”. Të arrestuarit janë H.L. dhe T.M., të dy shtetas të Kosovës, të cilët dyshohet se në cilësinë e drejtorit dhe menaxherit të një kompanie kanë keqpërdorur 62 mijë e 902 euro nga dy grante ndërkombëtare, vlera e përgjithshme e të cilave arrin në 575 mijë e 736 euro. Sipas Policisë, granti i parë, në vlerë prej 293 mijë e 500 eurosh, dyshohet se është keqpërdorur në shumën prej 23 mijë eurosh. Të dyshuarit pretendohet se kanë paraqitur raportime të rreme, duke deklaruar se shpenzimet për blerjen e makinerive ishin realizuar në tërësi. Ndërkaq, nga granti i dytë, në vlerë prej 282 mijë e 236 eurosh, dyshohet se janë keqpërdorur edhe 39 mijë e 902 euro, përmes të njëjtës mënyrë të raportimit të rremë të shpenzimeve. Policia ka bërë të ditur se gjatë hetimeve janë evidentuar keqpërdorime të dyshuara në vlerë totale prej 62 mijë e 902 eurosh. Arrestimi i tyre është realizuar në vazhdën e hetimeve që lidhen me rastin e datës 4 tetor 2026. Të dyshuarit janë intervistuar në prani të avokatëve të tyre mbrojtës dhe, me urdhër të prokurorit të rastit, janë ndaluar për 48 orë. Hetimet lidhur me rastin janë duke vazhduar.