Sfidat e inflacionit në Kosovë, ministri Murati tregon faktorët kyç që ndikuan te çmimet

Ministri i Financave, Punës dhe Transfereve, Hekuran Murati, është përballur me diskutime dhe kritika të ashpra gjatë mbledhjes së Komisionit për Buxhet, ku në fokus ka qenë gjendja aktuale ekonomike në vend dhe rritja e kostos së jetesës. Gjatë fjalës së tij, kreu i resursit financiar të qeverisë pranoi se shtrenjtimi i produkteve dhe shërbimeve përbën një sfidë reale për qytetarët, por theksoi se ky fenomen nuk është i izoluar vetëm në Kosovë, por paraqet një tendencë globale të nxitur nga zhvillimet gjeopolitike. ‘’Sa i përket inflacionit, duhet të them që patjetër është problem rritja e kostos së jetesës edhe në Kosovë, sikurse në të gjitha vendet tjera të botës. Dhe kjo ka kryesisht dy shkaktarë, fillimisht ishte lufta në Ukrainë e cila ndikoi në tronditje globale të çmimeve të energjisë dhe ushqimeve. Dhe tash së fundi kemi edhe valën e re që vjen si rezultat i konfliktit në gjirin Persik, ku për shkak të bllokadës së ngushticës së Hurmuzit ka pasur një tronditje globale sa i përket furnizimit me derivate dhe energji. E kjo ndikon në valë të re të rritjes së çmimeve gjithandej botës. Është fenomen që ndodh në të gjitha shtetet e botës. Si qeveri çfarë jemi munduar të bëjmë është t’u qëndrojmë qytetarëve afër’’, u deklarua Murati para deputetëve.