Klubi katalunas synon yllin e Premierligës si zëvendësues për Balden

Krerët e Barcelonës kanë piketuar tashmë opsionin ideal për të përforcuar repartin e prapavijës gjatë afatit kalimtar të janarit, duke hedhur sytë drejt kampionatit anglez. Në shënjestër të klubit katalunas ka rënë mbrojtësi Rayan Aït-Nouri, i cili shihet si zgjedhja e duhur nëse Alejandro Balde vendos të largohet nga “Camp Nou”. Profilin e 25-vjeçarit algjerian e vlerësojnë jashtëzakonisht shumë drejtori sportiv Deco dhe trajneri Hansi Flick, falë shkathtësisë së tij taktike për të mbuluar si pozicionin e mbrojtësit të majtë, ashtu edhe atë në qendër të mbrojtjes. Edhe pse nuk ka regjistruar ende asnjë paraqitje në Premierligë përgjatë këtij edicioni, drejtuesit e Manchester Cityt janë shprehur të gatshëm të lejojnë largimin e tij në formë huazimi, me kusht që marrëveshja të përfshijë detyrimin e blerjes përfundimtare. Nga ana e tyre, drejtuesit e Barçës po tentojnë të shmangin shpenzimet e menjëhershme financiare, por përballen me një konkurrencë të fortë në treg. Për shërbimet e lojtarit, kontrata e të cilit me “Citizens” skadon në vitin 2030, po interesohen seriozisht edhe dy gjigantë të tjerë evropianë, Manchester United dhe Juventusi.