Përplasja rreth Asociacionit, deputetja e VV-së: Rashiq nuk flet në emër të shtetit të Kosovës

Deputetja e Lëvizjes Vetëvendosje, Arbëresha Kryeziu-Hyseni, ka hedhur poshtë deklaratat e ministrit Nenad Rashiq lidhur me Asociacionin e komunave me shumicë serbe, duke theksuar se ato nuk pasqyrojnë qëndrimin zyrtar të Republikës së Kosovës. Gjatë një paraqitjeje televizive në emisionin “Politiko”, ajo u shpreh se sikur ekzekutivi aktual të kishte pasur vullnetin politik për ta avancuar këtë temë, sot nuk do të diskutohej për vetë ekzistencën e tij, por për rezultatet e zbatimit në pesë vitet e fundit. “Nëse Qeveria aktuale, e cila ka udhëhequr me vendin gjatë pesë vjetëve të fundit, do të kishte qenë e interesuar ta shtynte përpara çështjen e Asociacionit, besoni që tashmë do të kishim folur për raportin e pesë vjetëve të implementimit të Asociacionit dhe nuk do të kishim qenë në situatën se a është apo nuk është”, u shpreh ajo. Duke riafirmuar se pozicioni i Lëvizjes Vetëvendosje mbi këtë çështje është tashmë i qartë dhe i njohur për opinionin publik, Kryeziu-Hyseni shtoi se çdo prononcim tjetër që bie në kundërshtim me të nuk ka fuqi përfaqësuese për shtetin. “E dini mjaft mirë cili është qëndrimi i VV-së për këtë çështje dhe çfarëdo lloj deklarate tjetër që bie në kundërshtim me të, nuk e përfaqëson qëndrimin e Republikës së Kosovës”, përfundoi ajo.