Organizimi i Lojërave Mesdhetare ‘Prishtina 2030’ mbetet në pikëpyetje, KOK paralajmëron hapat e radhës

Sfidat dhe hapat e ardhshëm për organizimin e ngjarjes më të madhe sportive në vend ishin në qendër të vëmendjes gjatë mbledhjes së 17-të të Bordit Ekzekutiv të Komitetit Olimpik të Kosovës (KOK), e cila u drejtua nga presidenti Ismet Krasniqi. Gjatë këtij takimi u shqyrtua gjendja aktuale lidhur me Lojërat Mesdhetare “Prishtina 2030”, duke u ndalur te zhvillimet nga mbledhja e fundit e Komitetit Organizativ (OCMG) dhe mesazhet e adresuara nga Komiteti Ndërkombëtar i Lojërave Mesdhetare (ICMG). Drejtuesit e KOK-ut u njohën me detajet për takimin e paralajmëruar në Athinë me drejtuesit e ICMG-së, ku pala kosovare do të përfaqësohet nga dy delegatë secila prej Qeverisë, Komunës dhe KOK-ut. Pavarësisht angazhimeve, u konstatua se rreziku i humbjes së kësaj ngjarjeje ndërkombëtare vazhdon të jetë prezent. Në këtë kontekst, u hodh ideja për themelimin e një programi të veçantë për përgatitjen e federatave sportive, nismë kjo e mbështetur në Ligjin e posaçëm për Lojërat Mesdhetare 2030. Po ashtu, u caktua data e ngjarjes tradicionale për ndarjen e çmimeve, ku ceremonia e “Laureatëve 2026” do të organizohet zyrtarisht më 21 janar 2027. Ndërkohë, institucioni i sportit njoftoi se duke filluar nga 30 nëntori, federatat do të kenë mundësi të aplikojnë për programin e bursave “Shpresat Olimpike 2026”, mbështetje kjo që financohet përmes dikasterit shtetëror të sportit. Në rend dite ishin edhe Bursat Olimpike për Lojërat “Los Angeles 2028”. Pas një kërkesë zyrtare të ardhur nga Federata e Boksit e Kosovës, boksieri Donat Syla u hoq nga lista përkatëse. KOK ka bërë të ditur se Komisioni i Sportit do të mblidhet së shpejti për të vlerësuar ecurinë e sportistëve që aktualisht përfitojnë bursa, si dhe për të shqyrtuar kërkesat e reja që kanë mbërritur.