Festimi i diskutueshëm i golit, reagon mesfushori: S’kisha qëllim urrejtjen, por adhurimin e Krishtit

Mënyra se si Feliks Nmeça festoi golin e tij ka ngritur një valë debatesh dhe polemikash në opinionin publik. Përballë kritikave të shumta, futbollisti ka ndërmarrë një hap sqarues duke përdorur rrjetin social “Instagram”, ku ka shpjeguar kuptimin e vërtetë të gjestit të tij në fushën e blertë. Nmeça ka mohuar kategorikisht çdo aludim se festimi i tij lidhet me promovimin e ndonjë organizate të caktuar, diskriminimit apo nxitjes së urrejtjes. “Jam vënë në dijeni se festimi im i fundit ka shkaktuar disa keqkuptime”, ka shkruar ai në profilin e tij. “Festimi im nuk ka për qëllim të promovoj veten apo ndonjë organizatë. Përkundrazi, bëhet fjalë për vendosjen e ‘kurorës’ sime përpara Mbretit që do të vijë së shpejti dhe për të treguar se Jezusi është shpresa dhe forca ime!” – ka vijuar sqarimi i tij. Në përmbyllje të reagimit, lojtari ka theksuar se qëllimi i tij nuk ka qenë asnjëherë shpërndarja e intolerancës apo paragjykimeve. Sipas tij, si besimtar i krishterë, parimi kryesor mbetet përhapja e dashurisë dhe respektit të ndërsjellë për çdo individ, pavarësisht dallimeve në prejardhje, bindje apo botëkuptime.