Debati për integrimin evropian: Sofja zyrtare i përgjigjet kërkesave të Shkupit për përfshirjen e BE-së

Ministrja e Jashtme e Bullgarisë, Velislava Petrova, ka theksuar se rruga integruese e Maqedonisë së Veriut në Bashkimin Evropian përbën një çështje që i takon ekskluzivisht strukturave evropiane. Sipas saj, ky proces duhet të trajtohet brenda kornizave institucionale të unionit dhe në përputhje të rreptë me rregullat dhe procedurat e përcaktuara zyrtarisht. Këto deklarata erdhën si reagim ndaj një interviste të dhënë nga ministri i Punëve të Jashtme dhe Tregtisë së Jashtme i Maqedonisë së Veriut, Timço Mucunski, dhënë për agjencinë shtetërore të lajmeve AIM. Shefja e diplomacisë bullgare vuri në dukje se shteti i saj mbështet plotësisht angazhimin e Komisionit Evropian me secilin nga shtetet që synojnë anëtarësimin, duke i kushtuar vëmendje të merituar arritjeve konkrete të vlerësuara në nivel të Këshillit Evropian. Ajo riafirmoi se pala bullgare ka ruajtur vazhdimisht qasje të hapur ndaj dialogut konstruktiv me vendin fqinj. “Bullgaria ka qenë gjithmonë e hapur për një dialog konstruktiv me Republikën e Maqedonisë së Veriut. Ne shohim se një numër vendesh kandidate kanë bërë përparim të konsiderueshëm në zbatimin e detyrimeve të tyre, përfshirë një mjedis të ndërlikuar sigurie. Ne presim që Republika e Maqedonisë së Veriut të përmbushë gjithashtu detyrimet e saj dhe të fillojë ndryshimet e nevojshme për të ecur përpara në rrugën e saj evropiane”, thuhet në qëndrimin e bërë të publike nga Ministria e Jashtme e Bullgarisë. Në anën tjetër, ministri i Jashtëm i Maqedonisë së Veriut, Timço Mucunski, më herët gjatë prononcimit të tij për AIM kishte bërë të qartë se Shkupi zyrtar insiston në përfshirjen e Bashkimit Evropian në tryezën e bisedimeve dypalëshe me Bullgarinë. Ai sqaroi se kjo mbështetje mund të sigurohet qoftë përmes shteteve anëtare të veçanta, qoftë përmes vetë institucioneve evropiane. “Është e rëndësishme për ne që në të gjitha bisedimet që do të zhvillojmë me Bullgarinë në të ardhmen, të ketë pjesëmarrjen e Bashkimit Evropian”, pat deklaruar Mucunski, duke shtuar se për autoritetet maqedonase nuk ka rëndësi formati i saktë, por prania e një pale të tretë shtesë për të ndihmuar në rikthimin e besimit të ndërsjellë, duke theksuar se aktualisht vërehet një “mungesë themelore besimi” mes dy vendeve.