Dyshime te Franca: Aurelien Tchouaméni ndërpret stërvitjen, rrezikon mungesën në Ligën e Kombeve

Kombëtarja e Francës është përballur me një lajm shqetësues gjatë përgatitjeve të kësaj të marte. Mesfushori i Real Madridit, Aurelien Tchouaméni, nuk ka arritur ta çojë deri në fund seancën stërvitore, pasi ka ndjerë shqetësime në zonën e ijëve, duke ngritur alarmin në kampin e “Les Bleus”. Sipas raportimeve nga mediat franceze, gjendja e futbollistit është nën vëzhgim të rreptë dhe nuk përjashtohet mundësia që ai të largohet nga grumbullimi i kombëtares. Ky skenar do të nënkuptonte humbjen e ndeshjeve të ardhshme ndërkombëtare për mesfushorin, në varësi të rezultateve të testeve mjekësore. Ekzaminimet e detajuara që do të kryhen gjatë ditës së sotme do të jenë përcaktuese për fatin e tij në këtë grumbullim. Mjekët do të vendosin nëse 24-vjeçari është i aftë të vazhdojë qëndrimin me ekipin kombëtar apo nëse është e nevojshme kthimi i tij i menjëhershëm në Madrid për trajtim të mëtejshëm. Ndërkohë, drejtuesit e Real Madridit po ndjekin nga afër situatën, duke pritur një njoftim zyrtar nga Federata Franceze e Futbollit (FFF). Klubi spanjoll kërkon të kuptojë qartë shkallën e lëndimit, për të parë nëse ky problem fizik mund të ndikojë edhe në disponueshmërinë e lojtarit për angazhimet e ardhshme me fanellën e “Los Blancos”. Kujtojmë se përfaqësuesja franceze po përgatitet për dy përballje të rëndësishme në kuadër të Ligës së Kombeve. Skuadra e Didier Deschamps do të udhëtojë drejt Italisë këtë të enjte, ndërsa të dielën do të presë në shtëpi përfaqësuesen e Turqisë.