Rama nga Parisi: Pavarësia e Kosovës është realitet i pakthyeshëm, Serbia duhet ta pranojë sa më parë

Kryeministri i Shqipërisë, Edi Rama, gjatë pjesëmarrjes së tij në Forumin e Paqes në Paris, ka dhënë një mesazh të qartë për Serbinë lidhur me statusin e Kosovës. Sipas kreut të qeverisë shqiptare, pavarësia e Kosovës është një proces i mbyllur dhe i pakthyeshëm, ndërsa theksoi se përfitimi më i madh për Serbinë do të ishte përballja sa më e shpejtë me këtë realitet. Në sesionin dedikuar zgjerimit të Bashkimit Europian dhe gjeneratave të reja, Rama, i cili një ditë më parë zhvilloi një takim me presidentin francez Emmanuel Macron, vuri në dukje se Kosova nuk mund të shndërrohet në një “fantazi serbe”. Ai shtoi se ekzistenca e Kosovës si shtet sovran është fakt, dhe se pengesat që Serbia vazhdon të shfaqë janë pasojë e një “fantazme” të së shkuarës që pengon normalizimin e marrëdhënieve në rajon. Duke iu referuar ndërlikimeve në raportet Serbi-Kosovë, kryeministri Rama u shpreh se fqinjësia është një realitet i pashmangshëm, duke cituar një këshillë të gjyshes së tij se “fqinji i lumtur bën një shtëpi të lumtur”. Ai nënvizoi se përpjekja për një marrëdhënie konstruktive me fqinjët mbetet rruga e vetme për stabilitetin e Ballkanit Perëndimor. Në një tjetër zhvillim, Rama u ndal edhe te protestat e fundit në Shqipëri, duke i cilësuar si të papranueshme aktet e dhunës. Ai shpjegoi se pas këtyre manifestimeve qëndron një mozaik faktorësh, duke filluar nga pakënaqësitë legjitime për koston e jetesës, e deri te ndikimet e jashtme. Kryeministri akuzoi direkt Republikën Islamike të Iranit për përhapje të propagandës, si dhe opozitën dhe elementë të krimit të organizuar për instrumentalizimin e të rinjve. Sipas Ramës, ndërsa protestat e hershme u nxitën nga projekti turistik i lidhur me dhëndrin e Donald Trump, Jared Kushner, vala e fundit e protestave – e udhëhequr kryesisht nga studentët – është shndërruar në një skenë dhune. Ai siguroi se qeveria po i përgjigjet kësaj situate përmes dialogut dhe masave ekonomike në buxhetin e ri, ndërsa theksoi se çdo shkelje e ligjit do të trajtohet me vendosmëri nga organet e drejtësisë dhe rendit. Lidhur me aspiratat për anëtarësim në Bashkimin Europian, Rama u shpreh me rezerva ndaj premtimeve afatgjata, por shprehu optimizëm për ecurinë e negociatave, duke lënë të kuptohet se mbyllja e tyre brenda fundit të vitit të ardhshëm mbetet një objektiv i mundshëm.