Pas famës si 'meme', Doresa thyen heshtjen për pyetjen virale 'A e njeh Ukin?'

Influencerja e njohur, Doresa, është shndërruar në një fenomen të rrjeteve sociale pas një deklarate të saj gjatë një debati me banoren e Big Brother VIP Kosova, Jonën. Pyetja e saj “A e njeh Ukin?” u kthye brenda një kohe të shkurtër në një meme virale, duke pushtuar hapësirën digjitale. Kjo pyetje është bërë temë diskutimi edhe në ndërveprimet e saj me ndjekësit. Në një rubrikë pyetje-përgjigje në InstaStory, Doresa u përball sërish me këtë kuriozitet. Me një dozë humori, ajo u përgjigj shkurt: “Po, shumë, shumë mirë”, shoqëruar me një emoji duke qeshur. Duke qenë se kjo pyetje u përsërit disa herë nga ndjekësit, Doresa shfrytëzoi rastin për të sqaruar sfidat e saj me gjuhën shqipe. Ajo shpjegoi se është rritur në Gjermani dhe se vizita e saj e parë në Kosovë ka ndodhur në moshën shtatëvjeçare. “Prindërit e mi kanë pasur pesë fëmijë dhe kanë punuar çdo ditë. Nuk kemi pasur mundësi të mësojmë shumë shqip. Gjuhën e kam përvetësuar gjatë martesës dhe më pas përmes ndjekësve të mi. Nuk kam ndjekur kurrë shkollë shqipe si shoqet e mia”, rrëfeu ajo. Pavarësisht komenteve, Doresa ka treguar një qasje pozitive ndaj situatës. Ajo pranoi se tashmë edhe vetë e sheh me humor këtë episod dhe ndihet mjaft e relaksuar me faktin që është bërë pjesë e kulturës së internetit. “Po, jam shumë krenare që jam bërë meme. Dalëngadalë, edhe unë po qesh me këtë situatë dhe po më duket shumë cool”, përfundoi ajo.