Bashkim Jashari pret delegacionin e NATO-s: Forcohet partneriteti për mjekësinë ushtarake të FSK-së

Komandanti i Forcës së Sigurisë së Kosovës (FSK), gjenerallejtënant Bashkim Jashari, ka zhvilluar një takim zyrtar me kolonelin Zoltan Vekerdi, zëvendësdrejtor i Qendrës së Ekselencës së NATO-s për Mjekësinë Ushtarake. Aktualisht, një ekip prej dhjetë ekspertësh ushtarakë të kryesuar nga koloneli Vekerdi po qëndron në Kosovë. Misioni i tyre kryesor është mbikëqyrja dhe realizimi i procesit të validimit për dy ekipet mjekësore të nivelit ROLE 1 të FSK-së. Gjatë këtij bashkëbisedimi, gjenerallejtënant Jashari shprehu mirënjohjen e tij për mbështetjen e pakursyer dhe bashkëpunimin e frytshëm. Ai vuri në pah rolin kyç që ka luajtur Qendra e Ekselencës së NATO-s në forcimin dhe modernizimin e kapaciteteve shëndetësore të forcave tona. Diskutimet u fokusuan në shkëmbimin e eksperiencave të ndërsjella dhe zbatimin rigoroz të standardeve të Aleancës Veriatlantike në fushën e mjekësisë ushtarake. Pjesëmarrësit shqyrtuan gjithashtu çështje jetike për qëndrueshmërinë operacionale, rivalidimin e ekipeve mjekësore, si dhe angazhimin e FSK-së në aktivitetet e ardhshme të kësaj qendre, përfshirë ushtrimin fushor “Vigorous Warrior 28” (VW28). Ky proces vlerësimi ka për qëllim ngritjen e nivelit të aftësive operacionale të personelit mjekësor të FSK-së. Përmes kësaj nisme, synohet rritja e ndërveprueshmërisë dhe gatishmërisë së forcave tona për t'iu përgjigjur kërkesave dhe standardeve profesionale të NATO-s.