Gjyqtarët kosovarë marrin besimin e UEFA-s për kualifikueset e Botërorit të Futsallit 2028

Përfaqësimi i drejtësisë sportive nga Kosova në arenën ndërkombëtare vazhdon të shënojë suksese. Gjyqtarët Besart Ismajli, Besar Beqiri dhe Florentina Kallaba janë përzgjedhur për të ndarë drejtësinë në ndeshjet e rëndësishme të fazës kryesore kualifikuese për Kampionatin Botëror të Futsallit 2028. Kjo treshe e arbitrave kosovarë është deleguar për të drejtuar sfidën mes Francës dhe Malit të Zi. Ndeshja, e cila është e vlefshme për fazën e grupeve të këtij cikli kualifikues, do të zhvillohet më 6 nëntor 2026, në palestrën “Antarès Arena”, me fillim nga ora 20:00. Angazhimi i tyre në këtë përballje konfirmon edhe një herë vlerësimin që institucionet ndërkombëtare të futsallit kanë për gjyqtarët nga vendi ynë, duke shënuar një tjetër hap të rëndësishëm në karrierën e tyre profesionale në nivelet më të larta europiane.