Vizita e Listës Studentore të Serbisë, Ramadani kërkon llogari nga institucionet: Provokim i papranueshëm

Deputeti i Aleancës, Burim Ramadani, e ka cilësuar si një provokim të rëndë vizitën e përfaqësuesve të Listës Studentore të Serbisë në territorin e Kosovës, duke kërkuar nga organet kompetente sqarime të menjëhershme se si është bërë e mundur hyrja e tyre. Sipas Ramadanit, autoritetet shtetërore nuk duhet të lejojnë që politikanë nga Serbia të futen në vend me qëllim të nxitjes së tensioneve apo fyerjes së institucioneve të Kosovës. “Provokim i rëndë i serbëve nga Serbia, duhet të qartësohet si hynë në Kosovë”, ka shkruar ai në reagimin e tij. Ai ka theksuar se përkatësia politike e vizitorëve nuk mund të shërbejë si arsyetim dhe nuk e zbeh në asnjë mënyrë nevojën për kontroll të rreptë dhe përgjegjësi institucionale. “Pavarësisht nëse janë nga Lista e Studentëve, e Vuçiqit, Daçiqit, Vulinit apo dreqit e të birit, politikanët e Serbisë nuk guxon të lejohen të futen në Kosovë për të nxitur e provokuar, fyer e ofenduar shtetin e Kosovës”, ka deklaruar Ramadani. Në këtë linjë, ai ka vlerësuar pozitivisht vendimin e marrë nga Komisioni parlamentar për Çështje të Sigurisë dhe Mbrojtjes, i cili i ka kërkuar ministrit të Punëve të Brendshme raporte me shkrim lidhur me këtë ngjarje. “Është mirë që sot Komisioni Parlamentar për Siguri vendosi t’i kërkojë informatë me shkrim Ministrit të Punëve të Brendshme rreth kësaj. Si anëtar i këtij Komisioni, besoj që saktësia në këtë informim duhet të jetë e plotë”, ka theksuar ai, duke shtuar se transparenca dhe llogaridhënia e ekzekutivit mbeten të domosdoshme. Kjo vizitë ka qenë në qendër të vëmendjes edhe gjatë mbledhjes së Komisionit për Çështje të Sigurisë dhe Mbrojtjes, ku u diskutua gjerësisht nëse delegacioni serb kishte siguruar lejen e duhur nga institucionet e Kosovës përpara se të hynte në vend.