Zemaj i ashpër ndaj ekzekutivit: Qeveria po i ngatërron licencimet me punësimet e mjekëve

Deputeti i Lidhjes Demokratike të Kosovës, Armend Zemaj, ka hedhur akuza të reja ndaj qeverisë lidhur me trajtimin e çështjes së profesionistëve shëndetësorë dhe statistikat e prezantuara për kthimin e mjekëve në vend. Ish-ministri i Shëndetësisë ka vënë në pah se pushteti aktual dështon të kuptojë ndryshimin bazik mes procesit administrativ të licencimit dhe angazhimit real në punë brenda institucioneve publike shëndetësore. Nëpërmjet një reagimi publik, ai ka shprehur skepticizëm të plotë ndaj bilancit të ekzekutivit: “Një qeveri që nuk bën dallimin ndërmjet licencimit dhe punësimit të mjekëve në sistemin publik shëndetësor, po përpiqet ta paraqesë një proces administrativ si rezultat të punësimit. Çfarë të themi!!! Praktikantë të përhershëm në premtime, por premtimet nuk janë rezultate.” Më tej, deputeti i LDK-së ka theksuar se gjendja në terren tregon një tablo krejt tjetër nga ajo që përpiqet të paraqesë pushteti. Duke iu referuar shifrave zyrtare, ai ka bërë të ditur se në Kosovë vazhdojnë të jenë të papunë 534 mjekë të përgjithshëm dhe 91 mjekë specialistë. Sa i takon mjekëve të kthyer nga diaspora dhe të punësuar me kontrata të rregullta në sistemin publik gjatë kësaj legjislature, Zemaj ka deklaruar se shifra nuk arrin as nivelin dyshifror, e lëre më të jetë 171 sa pretendohet.