Bilanc tragjik i punëtorëve të energjetikës në Shqipëri, deputetja Koçeku: Humbën jetën 10 elektricistë në dhjetë muaj

Reagime të forta kanë pasuar pas ngjarjes së rëndë në Shkodër, ku 34-vjeçari Angjelin Nika humbi jetën në krye të detyrës. Lidhur me këtë tragjedi, deputetja e pavarur Marjana Koçeku ka ngritur alarmin për kushtet alarmante të punës në sektorin e energjisë. Koçeku ka bërë me dije se statistikat e periudhës së fundit janë tejet shqetësuese, pasi brenda dhjetë muajve janë shënuar dhjetë viktima mes punonjësve të këtij sektori. Ajo e ka krahasuar këtë situatë me një fushëbetejë, duke theksuar se elektricistët po humbin jetën çdo muaj për shkak të infrastrukturës së amortizuar dhe rrezikshmërisë së lartë në terren. Teksa ka pranuar se modernizimi i rrjetit kërkon kohë, deputetja ka kërkuar masa të menjëhershme nga ana e institucioneve shtetërore. Ajo ka bërë thirrje për krijimin urgjent të një skeme sigurimi dhe kompensimi të detyrueshëm, si dhe për një paketë mbështetjeje financiare afatgjatë për familjarët e atyre që humbin jetën në punë. Në mesazhin e saj, Koçeku ka nënvizuar se prioritet absolut i shtetit mbetet garantimi i sigurisë për çdo punonjës. Megjithatë, sipas saj, në rastet fatkeqe kur jeta shuhet në detyrë, institucionet kanë detyrimin moral dhe ligjor të qëndrojnë pranë familjeve në nevojë edhe pas përfundimit të ditëve të zisë.