Kriza në Mjekimin Intensiv: Familjarët detyrohen të paguajnë deri në 100 euro në ditë për barna

Kriza e vazhdueshme me mungesën e barnave esenciale në sistemin publik shëndetësor po vazhdon të shndërrohet në një barrë të rëndë financiare dhe emocionale për pacientët dhe familjarët e tyre, të cilët krahas betejës me sëmundjet e rënda, detyrohen të sigurojnë vetë terapinë e nevojshme mjekësore. Një shqetësim i ngritur nga familjarët e pacientëve që po trajtohen në Mjekimin Intensiv Qendror hedh dritë mbi gjendjen alarmante në të cilën ndodhen, ku faturat ditore vetëm për barna kapin shifra deri në 90 ose 100 euro. "90-100 euro po duhet me ble ilaçe çdo ditë, na rrjepen!", deklarojnë me shqetësim familjarët e pacientëve, duke veçuar mungesën e ampulave të kaliumit, një preparat fundamental që është jetik për funksionimin e rregullt të zemrës. Situata bëhet edhe më e papranueshme duke pasur parasysh se ampulat e kaliumit bëjnë pjesë zyrtarisht në Listën Esenciale të Barnave, çka nënkupton se detyrimi ligjor për sigurimin e tyre i takon institucioneve shtetërore. Për më tepër, një tjetër sfidë e madhe financiare për familjet mbetet sigurimi i antibiotikut të kushtueshëm “Tygacilin”. Edhe pse ky bar nuk figuron në Listën Esenciale, ai është i domosdoshëm për trajtimin e disa prej pacientëve që qëndrojnë për muaj të tërë nën kujdesin intensiv. Kjo gjendje e rëndë ngre dilema dhe pikëpyetje serioze lidhur me efikasitetin e menaxhimit të furnizimit me barna në institucionet publike shëndetësore dhe përgjegjësinë institucionale për të garantuar terapitë bazike për qytetarët. Derisa politikat shëndetësore mbeten nën përgjegjësinë e Qeverisë Kurti në nivel qendror, familjarët e pacientëve po vazhdojnë të përballen me një realitet zhgënjyes: në çastet më kritike kur më të dashurit e lor luftojnë për mbijetesë, ata detyrohen të enden për të siguruar mjetet financiare për barna.