Nisin në Abu Dhabi bisedimet e fshehta për Ukrainën: Witkoff dhe Kushner në tryezë për paqen

Përfaqësuesit nga Shtetet e Bashkuara, Ukraina dhe Rusia janë ulur sot në tryezën e bisedimeve në Abu Dhabi, në kuadër të një faze të re diplomatike që synon dhënien e fundit konfliktit të armatosur. Ky takim dyditor shënon kontaktin e parë të drejtpërdrejtë të këtij niveli që prej muajit shkurt. Delegacioni amerikan në këto bisedime përbëhet nga i dërguari special Steve Witkoff dhe Jared Kushner. Nëpërmjet një deklarate në platformën sociale X, Kushner theksoj se palët janë angazhuar intensivisht për të arritur një paqe afatgjatë dhe të qëndrueshme, duke i cilësuar diskutimet aktuale si një mundësi kyçe për të stimuluar procesin e negociatave. Nga ana e tij, Kievi ka bërë të qartë se prioritet mbetet sigurimi i garancive të forta për mbrojtjen e vendit dhe vendosja e një armëpushimi të menjëhershëm. Sipas Ukrainës, çështjet e ndjeshme territoriale mund të marrin zgjidhje vetëm përmes një samiti ballë për ballë mes presidentëve Vladimir Putin dhe Volodymyr Zelensky. Ndërkohë, pala ruse vazhdon të insistojë që trupat ukrainase të largohen nga katër rajonet e aneksuara, si dhe që Kievi të heqë dorë përfundimisht nga aspiratat për t'u anëtarësuar në NATO. Të dhënat nga mediat ndërkombëtare tregojnë se Jared Kushner ka hedhur në tryezë idenë që arkitektura e ardhshme e sigurisë të ndërtohet përmes një mekanizmi të përbashkët ndërmjet shteteve evropiane dhe Moskës.