Abdixhiku e Anu Prattipati diskutojnë mbi situatën politike dhe ekonomike të vendit

Kryetari i Lidhjes Demokratike të Kosovës (LDK), Lumir Abdixhiku, ka zhvilluar një takim pune me të ngarkuarën me punë të Ambasadës së Shteteve të Bashkuara të Amerikës në Prishtinë, Anu Prattipati. Përmes një njoftimi në rrjetet sociale, kreu i LDK-së bëri të ditur se në qendër të diskutimeve ishin aktualiteti politik, e ardhmja ekonomike e vendit, si dhe nismat strategjike jetike për zhvillimin e Kosovës. Gjatë këtij takimi, Abdixhiku shprehu mirënjohjen e tij për partneritetin e palëkundur që diplomatja amerikane dhe ambasadat e SHBA-së ruajnë me Lidhjen Demokratike të Kosovës, si dhe për ndihmën e gjithanshme që Washingtoni i ka dhënë ndër vite Kosovës. Në fund, ai rikonfirmoi se partneriteti dhe aleanca e ngushtë me Shtetet e Bashkuara të Amerikës përbëjnë shtyllën e pandryshueshme dhe orientimin strategjik të forcës politike që ai udhëheq.