Rrëfimi tronditës i tenistit zviceran: Si e mposhta mendimin për vetëvrasje në vitin 2024

Tenisti zviceran Leandro Riedi ka ndarë me ndjekësit e tij në rrjetin social Instagram një rrëfim prekës, duke zbuluar se mbi dy vite më parë kishte kaluar një krizë të thellë personale dhe kishte tentuar t'i jepte fund jetës. Sot, megjithatë, sportisti insiston se periudha e errët e mendimeve vetëvrasëse është lënë përfundimisht pas shpine, duke nisur një kapitull të ri. Data 21 qershor 2024 mbetet një kujtesë e pashlyeshme për Riedin, i cili pranoi publikisht se pikërisht atë ditë ekzistenca e tij pësoi një kthesë drastike, duke arritur në kufirin fatal të dorëzimit. "Atë ditë jeta ime ndryshoi përgjithmonë. Kisha arritur në një pikë ku tentova t’i jepja fund jetës sime," ka rrëfyer ai. Në rrëfimin e tij, 24-vjeçari shpjegon se ishte përballur gjatë me episode të rënda ankthi, sulme paniku dhe një lufte të brendshme psikologjike që zhvillohej në heshtje, larg syve dhe kuptimit të njerëzve që e rrethonin. Procesi i shërimit erdhi gradualisht, falë mbështetjes së specializuar mjekësore dhe angazhimit të vazhdueshëm për të punuar me vetveten. Sipas fjalëve të vetë tenistit, ai tashmë ndjehet thellësisht krenar që ka arritur ta mposhtë atë fazë kritike, duke e quajtur të mbyllur atë kapitull. "Jam vërtet i lumtur, mirënjohës për jetën time dhe i entuziazmuar për të ardhmen. Kjo përvojë ka ndryshuar këndvështrimin tim për gjithçka. Kam mësuar se fitoret dhe sukseset nuk kanë shumë kuptim nëse nuk je në paqe me veten. Shëndeti im, lumturia ime dhe jeta ime janë gjithmonë në radhë të parë," përfundon rrëfimin e tij sportisti nga Zvicra.