Modernizimi i Ushtrisë dhe siguria kombëtare, Rama zbulon fokusin e buxhetit të vitit 2027

Kryeministri Edi Rama ka bërë të ditur se fondet e parashikuara për mbrojtjen në buxhetin e vitit 2027 do t'i jepet prioritet modernizimit të Forcave të Armatosura dhe rritjes së sigurisë së vendit. Kreu i Qeverisë ka përcjellë këtë mesazh përmes një postimi në rrjetin social Facebook, shoqëruar me sekuenca video nga jeta e përditshme e të rinjve që studiojnë në Qendrën e Arsimimit Profesional të Ushtarëve në Bunavi të Vlorës. Sipas shefit të ekzekutivit, ky plan financiar do të shërbejë gjithashtu për të respektuar me përpikëri detyrimet që Shqipëria ka marrë përsipër si anëtare e NATO-s dhe në raport me partnerët e saj strategjikë. Postimi i tij fokusohet te puna dhe angazhimi i vazhdueshëm i institucioneve për të garantuar standarde bashkëkohore në mbrojtje. Në materialin e shpërndarë nga kreu i qeverisë pasqyrohet një ditë e zakonshme mësimore dhe stërvitore e studentëve të vitit të parë të programit Bachelor, si dhe e kursantëve që ndjekin Kursin e Përgatitjes së Oficerit në bazën ushtarake të Bunavisë në Vlorë. Duke vlerësuar angazhimin e tyre, Rama e ka cilësuar këtë rrugëtim si një sfidë të mbështetur te rregullat strikta, puna e palodhur dhe ndjenja e lartë e detyrës ndaj atdheut, elementë kyçë për përgatitjen e kuadrove të ardhshëm ushtarakë.