Vlora Çitaku takon diplomaten amerikane Prattipati: Fokus te partneriteti strategjik dhe rruga euroatlantike

Ushtruesja e detyrës së kryetares së Partisë Demokratike të Kosovës, Vlora Çitaku, ka zhvilluar sot një takim pune me të ngarkuarën me punë në Ambasadën e Shteteve të Bashkuara të Amerikës në Prishtinë, Anu Prattipati. Në qendër të bisedimeve ishin zhvillimet e fundit politike në vend dhe domosdoshmëria e përshpejtimit të proceseve integruese euroatlantike. Gjatë këtij takimi, Çitaku ka vlerësuar lart rolin e pazëvendësueshëm të Uashingtonit, duke falënderuar diplomaten amerikane për mbështetjen e palëkundur që SHBA-ja i ofron Kosovës në të gjitha etapat e shtetndërtimit. Në vijim të diskutimeve, Çitaku nënvizoi se aleanca strategjike midis dy vendeve mbetet jetike për konsolidimin e subjektivitetit ndërkombëtar të Kosovës, zhvillimin demokratik dhe forcimin e institucioneve. Ajo po ashtu konfirmoi përkushtimin e PDK-së për të qenë pjesë aktive në proceset me interes kombëtar, duke garantuar një bashkëpunim të ngushtë me partnerët amerikanë për ruajtjen e stabilitetit, paqes dhe avancimin e agjendës për anëtarësimin e vendit në strukturat euroatlantike.