Vlerësim i lartë nga UEFA: Arbitrja shqiptare Emanuela Rusta do të drejtojë super-sfidën e Champions League

Sytë e futbollit europian për femra do të jenë të përqendruar mbrëmjen e nesërme, duke nisur nga ora 21:00, në përballjen e nivelit të lartë mes Juventusit dhe Olympique Lyonnais. Ky duel, i vlefshëm për javën e katërt të fazës së grupeve në UEFA Women’s Champions League, do të gjykohet nga një sy shqiptar. UEFA i ka besuar drejtimin e këtij takimi prestigjioz arbitres së njohur të Superiores, Emanuela Rusta. Besimi i dhënë nga institucioni më i lartë i futbollit në kontinent vërteton rritjen e vazhdueshme të arbitres shqiptare në arenën ndërkombëtare, duke i dhënë asaj përgjegjësinë për të vendosur drejtësi në një ndeshje të këtyre përmasave. Në fushë do të përplasen dy emra të mëdhenj të futbollit kontinental. Nga njëra anë, Juventusi, një forcë tradicionale në futbollin italian, dhe nga ana tjetër, gjigantët francezë të Olympique Lyonnais, skuadra që mban rekordin absolut me 8 trofe të fituar në këtë kompeticion, duke u konfirmuar si një prej ekipeve më të suksesshme në historinë e Champions League për femra.