Lëvizje e bujshme te Sassuolo e Aro Muric: Shkarkohet trajneri Alberto Aquilani

Klubi italian Sassuolo, ku luan portieri i Kombëtares së Kosovës, Aro Muric, ka marrë vendimin zyrtar për të ndarë rrugët me trajnerin e skuadrës, Alberto Aquilani. Nëpërmjet një njoftimi për mediat, drejtuesit e klubit bënë të ditur se bashkëpunimi me teknikun italian dhe stafin e tij ka përfunduar. “U.S. Sassuolo Calcio njofton se ka shkarkuar trajnerin Alberto Aquilani dhe stafin e tij nga detyrat përkatëse. Klubi e falënderon trajnerin dhe bashkëpunëtorët e tij, duke u uruar suksese në të ardhmen”, thuhet në komunikatën zyrtare. Ky vendim vjen pas një ecurie negative të skuadrës, e cila regjistroi plot shtatë ndeshje radhazi pa shijuar fitoren. Disfatat e njëpasnjëshme dhe rezultatet zhgënjyese detyruan drejtuesit e klubit të ndërmarrin këtë hap drastik për të ndryshuar kursin e ekipit. Nën drejtimin e Aquilanit, gardiani dardan Aro Muric kaloi disa momente të vështira, duke humbur përkohësisht vendin e titullarit në formacion. Megjithatë, ai arriti të rikthehej në portë pikërisht në sfidën e fundit kundër Romës. Dueli ndaj kryeqytetasve shënoi gjithashtu paraqitjen e fundit të trajnerit italian në krye të Sassuolos. Ndërkohë, drejtuesit e klubit kanë nisur tashmë punën intensive për të identifikuar dhe emëruar pasardhësin e tij në stolin e skuadrës.