Në prag të Forumit të Paqes në Paris, Kurti mblidhet me miqtë francezë të Kosovës

Kryeministri i Republikës së Kosovës, Albin Kurti, ka zhvilluar një takim të veçantë me figura të shquara franceze që kanë lënë gjurmë përmes kontributit të tyre për shtetin tonë, ngjarje kjo e cila u realizua para hapjes zyrtare të Forumit të Paqes në Paris. Përmes një komunikate për media, bëhet e ditur se në këtë tryezë morën pjesë personalitete të njohura si Alain Richard, ish-ministër i Mbrojtjes dhe njohës i angazhimit të NATO-s në vitin 1999 për ndalimin e krimeve të luftës dhe spastrimit etnik ndaj shqiptarëve të Kosovës nga regjimi serb. Po ashtu, i pranishëm ishte edhe Gilles Pernet, ish-oficer ushtarak dhe ish-administrator i lartë pranë Departamentit të Çështjeve Strategjike në Ministrinë e Mbrojtjes, njëherësh bashkautor i botimit “Kosovo: récits sur la construction d’un État”, si dhe Sébastien Gricourt, mik dhe mbështetës i palëkundur i Republikës sonë. Në delegacionin e miqve francezë bënin pjesë edhe antropologia dhe studiuesja Véronique Nahoum-Grappe, e cila i ka kushtuar vëmendje të veçantë dhunës seksuale në konflikte, duke qenë aktive për Kosovën që nga vitet e '90-ta dhe autore e librit “Kosovo: un drame annoncé” (ajo është gjithashtu vajza e filozofit dhe sociologut të mirënjohur Edgar Morin). Të pranishme ishin edhe Frédérique Duversin, drejtore e Qendrës Kulturore të Kosovës në Paris, e cila prej dekadash ka mbështetur popullin tonë dhe ka promovuar kulturën, studentët e artistët tanë, si dhe Florence Hartmann, gazetare, ish-korrespondente e “Le Monde” dhe ish-zëdhënëse e Tribunalit të Hagës (ICTY), njohëse e shkëlqyer e zhvillimeve në Ballkanin Perëndimor dhe autore e veprës “Milosevic, la diagonale du fou”. Kryeministri Kurti ka bërë të ditur se gjatë këtij takimi bisedimet u shtrinë në disa prej temave kyçe, duke përfshirë progresin demokratik, hapat e qëndrueshëm drejt zhvillimit ekonomik, investimet e shtuara në fushën e sigurisë dhe mbrojtjes, si dhe duke trajtuar vendimin e padrejtë të datës 16 shtator dhe përpjekjet e përbashkëta për drejtësi në shkallën e apelit.