Ndërhyrje e rrallë mjekësore në Shqipëri: I hiqet një tumor prej 3.1 kilogramësh nga hunda 71-vjeçarit

Një operacion i jashtëzakonshëm dhe tejet i pazakontë është kryer nga një ekip mjekësor i Otorinolaringologjisë, të cilët kanë arritur të heqin një masë tumorale me peshë 3.1 kilogramë dhe me një gjatësi prej 50 centimetrash nga zgavra e hundës së një 71-vjeçari. Sipas mjekut kirurg ORL, Tedi Minarolli, pavarësisht se ndërhyrja nuk përbënte ndonjë sfidë të madhe teknike, përmasat e këtij tumori janë krejtësisht të paprecedenta për mjekësinë. “Në planin e vështirësisë teknike operacioni ishte mesatar, por për shkak të madhësisë ishte diçka e jashtëzakonshme. Flasim për 3.1 kilogramë dhe 50 centimetra në hundë”, u shpreh Minarolli, i cili shtoi se fillimisht e kishte pasur të vështirë të besonte foton e këtij rasti kur iu paraqit për herë të parë. Pacienti i moshuar vuante nga dënimi me burg dhe, sipas stafit mjekësor, ky fakt mund të ketë ndikuar në shmangien e ndërhyrjeve të hershme, duke lejuar që tumori të zhvillohej deri në këto përmasa alarmante para se të paraqitej për ndihmë. Nga ana e saj, shefja e shërbimit të ORL-së, Birkena Qirjazi, ka ngritur alarmin mbi dukurinë në rritje të pacientëve që paraqiten në spital në faza të avancuara, kur patologjitë janë rënduar ndjeshëm. Megjithatë, ajo theksoi besimin e saj te përkushtimi dhe rezultatet e suksesshme të brezit të ri të mjekëve. Operacioni delikat u kurorëzua me sukses të plotë falë angazhimit të ekipit të ORL-së nën drejtimin e Birkena Qirjazit dhe Tedi Minarollit, ndihmës së mjekëve Kristi Tata dhe Arli Kokomani, si dhe kontributit të stafeve të reanimacionit dhe mjekëve të rinj.