Bashkëpunimi ushtarak në fokus: Uashingtoni rikonfirmon mbështetjen e palëkundur për FSK-në

E Ngarkuara me Punë e Shteteve të Bashkuara të Amerikës në Kosovë, Anu Prattipati, ka zhvilluar një takim zyrtar me ministrin e Mbrojtjes, Ejup Maqedonci, ku është diskutuar mbi dinamikat e reja të sigurisë dhe bashkëpunimin dypalësh. Sipas njoftimit zyrtar të misionit diplomatik amerikan, biseda kryesore u fokusua te partneriteti i ngushtë dhe strategjik në fushën e mbrojtjes mes Shteteve të Bashkuara dhe Kosovës, duke vlerësuar arritjet e deritanishme. “Partneriteti ynë i fortë në fushën e mbrojtjes ishte në qendër të takimit të sotëm mes të Ngarkuarës me Punë, Anu Prattipati, dhe ministrit të Mbrojtjes, Ejup Maqedonci”, thuhet ndër të tjera në komunikatën e ambasadës. Ndërkohë, pala amerikane ka përsëritur zotimin se do të vijojë mbështetjen e pandërprerë për procesin e avancimit dhe ngritjes së kapaciteteve operacionale të Forcës së Sigurisë së Kosovës (FSK).