Zgjerim masiv i mbrojtjes: Lista Studentore e Serbisë premton buxhet ushtarak prej 5 për qind

Luka Ponorac, përfaqësues i Listës Studentore dhe njëherësh ish-oficer i Ushtrisë së Serbisë (VS), ka bërë të ditur se ky subjekt politik synon të rrisë buxhetin e mbrojtjes në pesë për qind të Prodhimit të Brendshëm Bruto (PBB), duke shënuar kështu një shtesë prej tri pikë përqindjeje krahasuar me nivelet aktuale. Gjatë shpalosjes së programit elektoral, ai theksoi se realizimi i këtij synimi ushtarak do të kushtëzohet nga gjendja reale financiare dhe kapacitetet njerëzore që qeveria e ardhshme do të trashëgojë brenda Ministrisë së Mbrojtjes dhe Ushtrisë së Serbisë. Njëkohësisht, ai paralajmëroi vijimin e procesit të modernizimit dhe zhvillimin e njëtrajtshëm të të gjitha degëve dhe shërbimeve ushtarake. “Deri më tani, projeksionet e buxhetit për ushtrinë kanë qenë afërsisht nga 2 deri në 2.5 për qind. Disa nga synimet, siç përcaktohen në program, janë që të synohet një rritje prej tri pikë përqindjeje, në mënyrë që të arrihen pesë për qind, sa është përcaktuar për ushtritë e vendeve të rajonit tonë, si në rajonin e afërt ashtu edhe në atë më të gjerë”, u shpreh Ponorac gjatë një paraqitjeje për Radio-Televizionin e Serbisë (RTS). Në kuadër të platformës së saj, Lista Studentore ka paralajmëruar gjithashtu një rritje lineare të pagave për gjithë personel ushtarak prej 20 deri në 30 për qind, e cila do të shoqërohet me ndërhyrje për të korrigjuar dukuritë e konsideruara si të padrejta në këtë sektor. “Ekziston një situatë ku një ushtar në njësinë speciale ka pagë më të lartë se një gjeneral. Ose një profesor në Akademinë Ushtarake, kolonel dhe doktor i shkencave, ka pagë më të ulët se një major në njësi, sepse Akademia i përket Ministrisë së Mbrojtjes dhe ata nuk marrin shtesën për shërbim në njësi”, shtoi ai. Sa i përket pajisjeve, Ponorac bëri të ditur se do të përcaktohen prioritete të qarta në prokurimet e armatimit. “Për shembull, blerja e artilerisë raketore me rreze veprimi nga 150 deri në 300 kilometra. Natyrisht, edhe projekti i kupolës strategjike të mbrojtjes ajrore, me rreze të shkurtër, të mesme dhe të gjatë veprimi. Sistemi i rrjetëzuar për komunikim, komandim, drejtim dhe shkëmbim të informacioneve të sigurisë, pajisjet dhe sistemet për vëzhgimin dhe paralajmërimin ajror, si dhe blerja e mjeteve ajrore pa pilot”, deklaroi ai për RTS-në. Po ashtu, ai theksoi se Lista Studentore synon t'i japë më shumë peshë këshillave profesionalë, Institutit Ushtarak-Teknik dhe Qendrës së Testimeve Teknike, ndërsa kërkoi që veprimtaria e shërbimeve të sigurisë t'i përmbahet rreptësisht kornizës ligjore, përfshirë hetimin e përgjegjësisë individuale për çdo shkelje të mundshme ligjore. Sipas llogaritjeve të fundit nga mediat vendore, rishikimi i buxhetit për vitin 2026 parashikonte ndarjen e rreth 2.8 për qind të PBB-së për mbrojtjen në Serbi, shifër kjo që përkthehet në afërsisht 315.9 miliardë dinarë, ose rreth 2.37 miliardë euro. Viti paraprak, respektivisht 2025, shënoi një buxhet ushtarak prej rreth 2.5 për qind të PBB-së.