Rrëfimi tronditës nga Ministria: Zyrtari më sulmoi me armë brenda tualetit

Dardan Bujupi, zyrtar i Ministrisë së Ekonomisë, ka ndarë detaje tronditëse për një incident të rëndë ku ka rrezikuar jetën, pasi është ndjekur dhe sulmuar me armë zjarri nga kolegu i tij, Sami Shaqiri. Sipas dëshmisë së tij, shkaku i këtij konflikti të dhunshëm kishte nisur për shkak të një komisioni disiplinor, pjesë e të cilit ishte sulmuesi i pretenduar. Bujupi ka treguar se ngjarja ka marrë një kthesë dramatike kur Shaqiri i ka bërë pritë brenda tualetit të institucionit, duke i drejtuar armën në shpinë. "Këta njerëz nuk duhet të jenë në institucione. Përtej faktit nëse duhet të vendoset një skaner në hyrje, të gjithë duhet të biem dakord se problemi qëndron te njeriu dhe jo te pajisja në vetvete", deklaroi ai, duke vënë në pah mungesën e sigurisë. Duke përshkruar momentet e tmerrit hap pas hapi, ai tregoi se si u gjend në befasi të plotë ndërsa po lante duart. "Struktura e tualeteve tona është e tillë që, teksa lan duart, e ke shpinën e kthyer nga pjesa tjetër e hapësirës. Në atë moment erdhi ai zyrtar dhe ma vendosi revolen në shpinë, ndërsa dorën tjetër ma vuri në fyt. Instinktivisht u ktheva dhe e shtyva, pa e kuptuar saktësisht se çfarë po ndodhte, dhe në atë çast arma i ra në tokë", shpjegoi Bujupi. Pas rënies së armës, ai përfitoi nga momenti për t'i shpëtuar rrezikut, duke u larguar me shpejtësi dhe duke alarmuar të tjerët për rrezikun potencial. "Derisa ai u ul për të marrë armën, unë hapja derën, dola jashtë dhe bërtita me të madhe që të largoheshin pasi ai ishte i armatosur", shtoi ai. Pas këtij incidenti alarmant, autori i dyshuar është larguar nga vendi i ngjarjes, ndërkohë që është njoftuar menjëherë Policia për të ndërmarrë masat e duhura ligjore.