Incident i armatosur në Ministrinë e Ekonomisë: Kërcënohet djali i Donika Kadaj-Bujupit, vihet në pranga i dyshuari

Një ngjarje e rëndë ka tronditur sot ambientet e Ministrisë së Ekonomisë, ku djali i ish-deputetes së Kosovës, Donika Kadaj-Bujupi, dyshohet se është bërë cak i një kanosjeje me armë zjarri nga një punonjës i këtij dikasteri. Lajmin rreth arrestimit të personit të përfshirë në këtë incident e ka konfirmuar vetë ish-deputetja Kadaj-Bujupi përmes një deklarate dhënë për redaksinë tonë. Burimet bëjnë me dije se i dyshuari për këtë ngjarje është zyrtari Sami Shaqiri, ndërsa tensionet dyshohet se nisën si pasojë e një konflikti lidhur me një komision disiplinor. Mosmarrëveshja u ndez pasi i riu, i cili është djali i ish-deputetes dhe njëkohësisht epror i Shaqirit, kishte refuzuar të përfshihej në këtë komision. Sipas detajeve paraprake, përplasja kishte nisur fillimisht në rrugë digjitale, ku Shaqiri i kishte kërkuar me email plotësimin e një dokumenti zyrtar, ndërsa Bujupi i ishte kthyer duke i thënë që ta plotësonte vetë formularin dhe më pas t'ia dërgonte për firmë. Situata ka marrë një kthesë të rrezikshme kur zyrtari dyshohet se e ka ndjekur Bujupin deri në tualetet e ministrisë, ku dhe e ka kërcënuar me armë. Pas ndërhyrjes, personi i dyshuar është prangosur nga organet e rendit, ndërkohë që ende mungon një komunikatë zyrtare nga Policia e Kosovës për të zbardhur plotësisht rrethanat e ngjarjes.