Seanca e re plenare: Marrëveshjet ndërkombëtare dhe debati i ashpër për energjinë në fokus të Kuvendit

Kuvendi i Kosovës do të mblidhet në seancën e radhës këtë të enjte, më 12 nëntor, me fillim nga ora 10:00, ku pritet të diskutohet një agjendë e ngarkuar me çmime, interpelanca dhe marrëveshje financiare. Vendimi është bërë i ditur nga shefja e Grupit Parlamentar të Lëvizjes Vetëvendosje, Arbërie Nagavci, pas mbledhjes së Kryesisë së Kuvendit të mbajtur të hënën. Ajo ka sqaruar se krahas çështjeve të zakonshme, ligjvënësit do të kenë përpara katër marrëveshje ndërkombëtare që i përkasin sektorit të drejtësisë. Sipas Nagavcit, pas shqyrtimit të këtyre marrëveshjeve, seanca do të vazhdojë me interpelancën e thirrur për ministrin e Shëndetësisë, e cila vjen me iniciativë të Partisë Demokratike të Kosovës (PDK), si dhe me trajtimin e mocionit përmbajtjesor që lidhet me situatën energjetike në vend. “Seanca e radhës do të mbahet ditën e enjte, më 12 nëntor, në fillim nga ora 10:00. Përveç pikave të rregullta, që janë deklarimet jashtë rendit të ditës dhe pyetjet parlamentare, do të shqyrtohen edhe katër marrëveshje ndërkombëtare që kaluan sot në Komisionin për Legjislacion. Janë katër marrëveshje nga fusha e drejtësisë dhe pas këtyre marrëveshjeve ndërkombëtare është interpelanca me ministrin e Shëndetësisë, e iniciuar nga PDK-ja. Pastaj edhe mocioni përmbajtjesor për trajtimin e çështjes së energjisë”, deklaroi Nagavci. Sektori i energjisë premton të jetë një nga mollët e sherrit në diskutimet e kësaj jave. Shefi i Grupit Parlamentar të Aleancës, Besnik Tahiri, i cili është edhe iniciues i këtij debati, e ka vlerësuar energjinë si sfidën kryesore kombëtare, duke ngritur alarmin për pasigurinë e furnizimit, tarifat e larta të rrymës dhe mënyrën se si janë realizuar transaksionet për blerjen e saj. Tahiri ka theksuar se gjatë gjashtë viteve të qeverisjes janë shpenzuar mbi një miliard euro për importin e energjisë, një shifër që sipas tij kërkon jo vetëm vëmendjen e Prokurorisë, por edhe nisjen e një hetimi të mirëfilltë parlamentar. “Të enjten do të debatojmë për energjinë. Për temën më të rëndësishme që sot e ka Kosova, jo vetëm mungesën e energjisë elektrike, mirëpo edhe aspekte që ndërlidhen me çmimin e rrymës. Njëkohësisht, edhe elemente që lidhen me transaksionet dhe blerjen e rrymës. Ajo çka ka ndodhur gjatë këtyre viteve të kësaj qeverie, blerja e rrymës mbi 1 miliard euro, është një çështje që do të duhej të kishte jo vetëm hetim brenda Prokurorisë, por edhe hetim parlamentar. Është e pabesueshme që për gjashtë vjet të mos rinovohet B1. B1 nuk është në funksion dhe as nuk do të hyjë në funksion këtë dimër”, u shpreh Tahiri.