Ministria e Shëndetësisë: 171 mjekë dhe profesionistë shëndetësorë u kthyen në Kosovë gjatë vitit 2025

Gjatë vitit 2025, gjithsej 171 punonjës të kujdesit shëndetësor janë pajisur me licencë për të ushtruar aktivitetin e lor në Kosovë, duke përfshirë si vendës ashtu edhe profesionistë nga trojet e tjera shqiptare. Lajmi është bërë i ditur nga Durim Elshani, këshilltar për media i ministrit të Shëndetësisë, Arben Vitia, i cili u referua shifrave zyrtare të Bordit për Licencimin e Profesionistëve të Huaj Shëndetësorë. Në mesin e tyre, 12 janë mjekë dhe specialistë me shtetësi të Kosovës, të cilët pasi kanë përfunduar shkollimin dhe specializimet e tyre në shtete të ndryshme evropiane, kanë vendosur të rikthehen për t'i shërbyer vendit. Ndërkaq, pjesa tjetër prej 159 personash përbëhet nga profesionistë shëndetësorë shqiptarë që zotërojnë shtetësi të huaj ose posedojnë dy shtetësi, të cilët tashmë janë pajisur me lejen përkatëse për të punuar në institucionet shëndetësore të Kosovës. Sipas informacioneve të siguruara nga Oda e Mjekëve të Kosovës, gjatë këtij viti vetëm 95 profesionistë të shëndetësisë kanë kërkuar dokumentacionin e nevojshëm për të aplikuar për punësim në shtetet evropiane, shifër kjo që paraqet nivelin më të ulët të regjistruar ndër vite. Për qëllime krahasimi, në periudhën e vitit 2022, numri i personave që kishin kërkuar këto dokumente ishte dukshëm më i lartë, duke arritur në 211 profesionistë shëndetësorë. Megjithatë, përfaqësuesi i Ministrisë ka sqaruar se tërheqja e dokumenteve për punësim jashtë vendit nuk nënkupton domosdoshmërisht largimin përfundimtar nga Kosova apo pajisjen e menjëhershme me licencë puna në tregjet evropiane.