Kartoni i kuq i Ajetit kushton shtrenjtë: Lugano pëson disfatën e parë në këtë edicion pas golaðit nga St. Gallen

Lideri aktual i Super Ligës së Zvicrës, Lugano, ka regjistruar disfatën e parë për këtë sezon gjatë duelit të zhvilluar të dielën. Ekipi nga Lugano u mposht me rezultatin e thellë 5:0 në transfertë përballë St. Gallenit, në një takim fatin e të cilit e vulosi herët ndëshkimi me karton të kuq i sulmuesit Albian Ajeti. Lojtari shqiptar, i cili mbron ngjyrat e Luganos i huazuar nga rradhët e Baselit, u ndëshkua direkt me karton të kuq qysh në minutën e 11-të të takimit. Ajeti bëri një ndërhyrje të rëndë me takë në kyçin e këmbës së kundërshtarit Vandermersch, i cili fatmirësisht shpëtoi pa lëndime. Ngjarja u vlerësua si një vendim i drejtë për ndëshkimin disiplinor. Duke përfituar nga epërsia numerike në fushë, vendasit e St. Gallenit realizuan dy herë brenda pak çastesh, me anë të Chima Okorojit në minutën e 33-të dhe Andrin Hunziker një minutë më vonë, në të 34-tën. Për më tepër, Tom Gaal shtoi edhe një gol tjetër me kokë pas një harkimi nga këndi në minutat shtesë të fraksionit të parë. Në pjesën e dytë, Hunziker realizoi sërish, ndërsa epilogun e kësaj ndeshjeje e vulosi Leon Frokaj, i cili shënoi golin e pestë në minutën e 84-t. Pas përfundimit të sfidës, mesfushori i Luganos, Uran Bislimi, ka pranuar hapur epërsinë e kundërshtarit duke deklaruar se humbja ishte plotësisht e merituar. Pavarësisht këtij hapi fals dhe rezultatit negativ, Lugano vazhdon të ruajë kreun e renditjes tabelare, duke grumbulluar gjithsej 34 pikë pas 13 ndeshjeve të zhvilluara.