Krizë shëndetësore në Vlorë: Zulohet ndotje fekale në ujësjellës, rrezik serioz edhe nga depozitat e pallateve

Situata e krijuar me cilësinë e ujit të pijshëm në qytetin bregdetar të Vlorës ka marrë përmasa më alarmante. Pas konstatimeve të para për mungesë të klorit dhe prani të amoniakut në dy zona të ndryshme, testet laboratorike të fazës së dytë kanë konfirmuar praninë e ndotjes fekale, duke ngritur alarmin për shëndetin publik. Autoritetet kompetente kanë ndërhyrë duke zbritur në terren për verifikime intensive, ndërkohë që një tjetër vatër rreziku mbeten depozitat e ujit të instaluara në tarracat e pallateve. Këto fundit vazhdojnë të përbëjnë një problematikë të madhe për shkak të mungesës së pastrimit dhe mosrespektimit të standardeve higjieno-sanitare. Qytetarët e Vlorës i përdorin këto rezerva uji jo vetëm për nevoja sanitare dhe larjen e enëve, por edhe për gatim e konsum direkt, gjë që rrit ndjeshëm mundësinë e prekjes nga infeksionet dhe mikroorganizmat e dëmshëm në rast se uji komprometohet. Përballë kësaj situate emergjente, kërkohet intensifikimi i kontrolleve nga institucionet, informim transparent për opinionin publik mbi çdo rezultat të analizave, si dhe ndërmarrja e menjëhershme e masave për dezinfektimin e rregullt të depozitave, si e vetmja garanci për mbrojtjen e shëndetit të banorëve.