Peci dalë zot Gërvallës pas thirrjeve për dorëheqje: Opozita e ka pasur në shënjestër qysh në nisje të qeverisjes

Faton Peci, ish-ministër i Bujqësisë dhe aktualisht kryetar i Komunës së Mitrovicës, ka dalë në mbrojtje të bashkëpartiakes së tij, ministres së Drejtësisë, Donika Gërvalla, duke i cilësuar si të pajustifikueshme thirrjet e fundit për largimin e saj nga detyra pas tragjedisë ku mbeti e vrarë Arlinda Zekaj. Sipas tij, presionet e tilla ndaj Gërvallës nuk janë risi, por një skenar i përsëritur nga oponentët politikë qysh prej fillimit të kabinetit qeverisës Kurti 2 në mars të vitit 2021, trend që, sipas tij, po vazhdon edhe tani në nisje të mandatit të ri katërvjeçar të kryeministrit Albin Kurti. Peci ka theksuar se këto sulme janë të kalkuluara mirë, duke pasur parasysh se Gërvalla përfaqëson partnerin kryesor në aleancën me kreun e ekzekutivit. Ai ka kujtuar se një qasje e ngjashme është përdorur edhe ndaj tij në fund të mandatit, pasi kishte dhënë një kontribut të madh në fushën e bujqësisë. Në këtë kontekst, Peci ka vënë në pah rezultatet konkrete gjatë periudhës kur ka drejtuar dikasterin e bujqësisë. Ai ka treguar se në vitin 2021 Kosova importonte rreth 37 milionë euro grurë, kryesisht nga Serbia, shifër kjo që ka rënë në 18 milionë kur ai ka lëshuar detyrën. Po ashtu, ai ka përmendur rritjen e ndjeshme të eksporteve, ku nga vetëm 135 tonë domate të eksportuara në vitin 2021, në nëntëmujorin e vitit 2026 kjo shifër ka kapërcyer mbi 4 mijë e 700 tonë, duke shënuar një rritje prej afër 50% të eksporteve të produkteve ushqimore. Peci ka përfunduar se pikërisht këto arritje dhe puna e suksesshme kanë nxitur opozitën që të synojë goditjen e punës së mirë që është bërë në këtë sektor.