Spalletti pas barazimit dramatik me Fiorentinën: Nganjëherë humbasim qetësinë në situata të thjeshta

Kryetrajneri i Juventusit, Luciano Spalletti, ka analizuar barazimin 2:2 kundër Fiorentinës në takimin e vlefshëm për javën e 11-të në Serie A, duke theksuar nevojën urgjente për më shumë stabilitet dhe gjakftohtësi nga ana e skuadrës së tij. I pranishëm para mikrofonave të DAZN-it në një atmosferë të qetë, strategu italian pranoi se bardhezinjtë shpesh përballen me momente pasigurie gjatë sfidës. “Herë pas here mbytemi në një gotë ujë. Pastaj humbasim pak sigurinë dhe qetësinë në lojë. Pësuam gol shumë shpejt pas fillimit të ndeshjes. Më pas patëm reagime të mira, por nuk arrijmë të jemi të qëndrueshëm në paraqitjet individuale dhe në lojën e skuadrës”, deklaroi Spalletti. Tekniku italian vuri në dukje se ekipi i tij alternon faza të mira loje, por dështon t'i menaxhojë ato në harkun e gjithë takimit. “Luajmë mirë për 10 minuta, pastaj na mungojnë gjëra të tjera. Në disa momente duket sikur vendosim ta pranojmë situatën, pa marrë vendime dhe pa vepruar. Pikërisht vendimmarrja dhe veprimi të largojnë dyshimet. Nëse vazhdon të qëndrosh në mëdyshje, nuk arrin të fitosh diçka të rëndësishme”, u shpreh ai. I ngacmuar nga gazetarët mbi mundësinë e humbjes së kontrollit apo besimit brenda grupit, Spalletti u përgjigj me nota humori. “Të humbas skuadrën? Po çfarë të humbas? Unë shkoj dhe i përqafoj të gjithë çdo ditë. Drejtorët janë aty çdo ditë, na shikojnë dhe na përcjellin. Duhet të bëjmë më mirë, por nuk humbet asgjë. Të gjithë jemi në kërkim të zgjidhjes për ta përmirësuar situatën dhe jemi edhe afër saj”, shtoi më tej ai. Në fund të prononcimit, trajneri i Juventusit u pyet rreth situatës së dyshimtë të prekjes së topit me dorë nga João Mário, por preferoi të mos ndalet gjatë te ky episod. “Nuk e di dhe nuk dua ta rishikoj. E kisha parë që nga fusha”, përfundoi Spalletti.