Drama në Zvicër: Baseli pa Shaqirin arrin vetëm një barazim ndaj Thunit pas autogolit në minutat e fundit

Baseli është detyruar të mjaftohet me një pikë nga udhëtimi te Thuni, pas një barazimi spektakolar 3:3 në sfidën e vlefshme për javën e 13-të të elitës së futbollit zviceran. Skuadra nga Bazeli u paraqit pa yllin e saj, Xherdan Shaqirin, i cili u la jashtë fushës shkaku i pezullimit nga kartonët e verdhë, mungesë kjo që u ndje ndjeshëm. Pasi lëshoi një epërsi prej dy golash, skuadra mysafire dështoi të kthehej te triumfi, duke regjistruar kështu ndeshjen e pestë me radhë pa shijuar fitoren në kampionat. Fillimi i takimit ishte tejet premtues për mysafirët. Vetëm pas 60 sekondave lojë, Zan Celar zhbllokoi shifrat duke shënuar për 0:1, kurse në minutën e 12-të, Philip Otele dyfishoi epërsinë pas një asistimi të precizuar nga Metinho. Megjithatë, përgjigja e Thunit erdhi menjëherë në minutën e 16-të për të ngushtuar epërsinë në 1:2. Situata u tensionua kur Furkan Dursun i rrëmbeu topin portierit Jonas Omlin, duke ia pasuar atë Brighton Labeau, i cili e dërgoi sferën në rrjetë. Vendasit intensifikuan sulmet dhe në minutën e 39-të barazuan rezultatin në 2:2, pasi Nils Reichmuth mposhti portierin Omlin me një goditje precize në këndin e portës. Fraksioni i dytë nisi sërish me avantazhin e Baselit. Pas një aksioni të ndërtuar bukur ndërmjet Metinhos dhe Zan Celarit, ky i fundit u ndal në mënyrë të parregullt brenda zonës, duke detyruar gjyqtarin të akordojë penallti. Celar u tregua i pagabueshëm nga pika e bardhë në minutën e 55-të, duke rikthyer epërsinë në 2:3. Por, fitorja iu mohua mysafirëve në minutën e 79-të. Pas një harkimi nga goditja e lirë e ekzekutuar prej Fabio Fehr, Kevin Rüegg devijoi fatkeqësisht topin me kokë në portën e tij, duke vulosur barazimin përfundimtar 3:3. Me këtë rezultat, Baseli vazhdon ecurinë negative prej pesë ndeshjesh pa fitore, ndërsa Thuni mbetet ende pa triumf para tifozëve të vet në këtë edicion. Në tabelën e klasifikimit, Baseli zë vendin e shtatë me 15 pikë të grumbulluara, kurse Thuni pozicionohet një shkallë më poshtë me 14 pikë në llogari. Pas përfundimit të ndeshjeve të kombëtareve, Thuni do të udhëtojë për t'u ndeshur me Young Boys më 21 nëntor, ndërsa Baseli do të jetë nikoqir i Luzernit një ditë më vonë.