Emocionet e para në Kosovë, kreu i FFK-së takon sulmuesin më të ri të Dardanëve

Enis Rexhepi është një nga tre fytyrat e reja të përzgjedhura nga trajneri Franco Foda për ndeshjet e muajit nëntor, ku Përfaqësuesja e Kosovës do të përballet me Izraelin dhe Irlandën në kuadër të Ligës së Kombeve. Sulmuesi i talentuar është pritur në një takim zyrtar nga presidenti i Federatës së Futbollit të Kosovës, Agim Ademi. Kreu i shtëpisë së futbollit kosovar ka ndarë përshtypjet e tij në rrjetet sociale rreth këtij bashkëbisedimi. "Pas takimit tonë në Gjermani, vetëm pak javë më vonë ritakohemi sërish, por kësaj radhe në Kosovë", ka shkruar Ademi, duke shtuar se pritja në shtëpi mbart gjithmonë ndjenja unike. "Takimi në shtëpi ka gjithmonë një emocion të veçantë. Mirë se erdhe në shtëpinë tënde, Enis", u shpreh ai, duke i uruar fat dhe suksese me fanellën kuqezi të Dardanëve. Pas këtij takimi, vetë lojtari ka ndarë emocionet e tij për faqen zyrtare të FFK-së, duke bërë të ditur se vendimi për t'iu bashkuar Kosovës ka qenë tejet i natyrshëm dhe i mirëmenduar. "Ka qenë shumë lehtë me vendos për Kosovën, se e kam vendosur me zemër", u shpreh Rexhepi. Ai gjithashtu përmendi lidhjet e forta me disa nga bashkëkombësit e tij që aktivizohen në kampionatin gjerman. "I kam edhe shokët që luajnë në Bundesligë në Gjermani, projekti shumë më pëlqen këtu. Kosova i ka lojtarët shumë të mirë, unë do ta jap maksimumin që të luaj si startues", përfundoi sulmuesi i ri.