Skenar filmi spiunazhi: Dyshimet për lidhjen intime të kreut të Nvidia-s me një agjene kineze

Një histori që ngjan plotësisht me skenarin e një filmi aksion dhe spiunazhi po merr përmasa alarmante rreth gjigantit amerikan të teknologjisë, Nvidia, një kompani vlera e së cilës në bursë kap shifrën e 4.500 miliardë dollarëve. Në qendër të këtij skandali ndërkombëtar përfshihen shërbimet e inteligjencës amerikane, një agjene e dërguar nga Pekini, si dhe sekretet jetike të mikroçipave të inteligjencës artificiale, të cilët pritet të rikonfigurojnë të ardhmen e globit. Për më tepër, ngjarja merr një kthesë edhe më intriguese për shkak të një lidhjeje të fshehtë sentimentale që kapërcen kufijtë e rreptë profesionalë. Sipas një dokumenti voluminoz të përpiluar nga agjencitë e zbulimit amerikan gjatë pranverës së kaluar, qeveria e Shteteve dërgoi sinjale se drejtori ekzekutiv i Nvidia-s, Jensen Huang, dyshohet se ka pasur një lidhje romantike me Alice Huang. Pavarësisht mbajtjes së të njëjtit mbiemër me kreun e Nvidia-s, identiteti dhe funksioni i gruas ndryshojnë rrënjësisht historinë. Alice Huang shërben si drejtuese e lartë në kompania Megaspeed me seli në Singapor, e cila operon si kliente e korporatës amerikane të mikroprocesorëve. Megjithatë, autoritetet e SHBA-së ngrenë dyshime të forta se ajo mund të jetë rekrutuar si agjene nga vetë Ministria kineze e Sigurisë së Shtetit. Kompania Megaspeed kishte rënë në radarin e autoriteteve amerikane që prej dy vitesh. Ajo akuzohej se kishte devijuar mikroçipa të avancuar të Nvidia-s nga territori i Shteteve e Bashkuara drejt Kinës, duke shkelur hapur dispozitat ligjore të eksportit. Për shkak të këtyre akuzave, vetë Nvidia ndërmori një hetim të brendshëm për të hedhur dritë mbi ngjarjen. Edhe pse hetimi fillestar nuk gjeti prova për shkelje ligjore, zhvillimet e fundit kanë ndryshuar rrënjësisht situatën. Dosja e përgatitur në muajin prill nga Agjencia Qendrore e Inteligjencës (CIA), e cila iu dorëzua drejtpërdrejt presidentit Donald Trump, përmban dokumente, fotografi dhe dëshmi të mjaftueshme që sugjerojnë veprimtari të pastër spiunazhi. Nga ana e saj, drejtoria e Nvidia-s ka vijuar të mbrojë pozitat e saj, duke nënvizuar se drejtori ekzekutiv ka takime të rregullta me drejtues të ndërmarrjeve që përbëjnë bazën e klientëve të korporatës. Këto zbulime të CIA-s mund të shpjegojnë gjithashtu arsyen pse, të paktën në fazën e parë, Jensen Huang u la jashtë ftesave për samitin e muajit maj ndërmjet presidentit amerikan Donald Trump dhe homologut të tij kinez, Xi Jinping, ndonëse më vonë ai u përfshi në delegacionin e takimit. Më tej, drejtuesi i Nvidia-s mori pjesë edhe në darkën zyrtare shtetërore të organizuar në muajin shtator në Uashington, ku presidenti Trump priti udhëheqësin kinez Xi Jinping. Beteja për mikroçipat e avancuar mbetet pika më e nxehtë e fërkimit gjeopolitik mes Uashingtonit dhe Pekinit. Shtetet e Bashkuara mbeten në ankth se Kina mund të arrijë autonomi teknologjike, duke rrezikuar primatin ekonomik amerikan në fushën e inteligjencës artificiale, ndërkohë që shqetësimet e Uashingtonit shtrihen tashmë shumë më gjerë se kaq.