Zekolli paralajmëron përfundimin e autostradës Shkup-Bllacë për verën e vitit 2030

Përveç tokës shtetërore, trasesë së segmentit të dytë të autostradës Shkup-Bllacë do t'i duhet të shtrihet nëpër 304 prona të ndryshme private. Sipas të dhënave nga Ndërmarrja Publike “Rrugët Shtetërore”, deri më tani kanë mbetur pa u shpronësuar vetëm 45 parcela. Çështjet pronësore-juridike po trajtohen nga Byroja për ekspertizë ligjore, ndërkohë që një pjesë e tyre tashmë kanë përfunduar në instancat gjyqësore. Autoritetet bëjnë me dije se procesi i shpronësimit po zhvillohet në tri kategori kryesore: toka bujqësore e kategorisë së tretë dhe të katërt me 960 denarë për metër katror; toka bujqësore e kategorisë së parë dhe të dytë me 1,200 denarë për metër katror; si dhe toka ndërtimore pa leje ndërtimi me 3,000 denarë për metër katror. Zëvendësministrja e Transportit, Kaltrina Zekolli, u shpreh se kjo procedurë po ecën në rrugë të mbarë dhe pret që ky segment të jetë plotësisht i gatshëm deri në verën e vitit 2030. “Për projektin Shkup-Bllacë, siç e dini, më 26 gusht si Ministri e Transportit kemi lëshuar lejen e ndërtimit, ndërsa pjesën tjetër e menaxhon Ndërmarrja Publike ‘Rrugët Shtetërore’ në cilësinë e investitorit. Punimet në terren tashmë kanë nisur! Është dhënë një afat prej 60 ditësh për realizuesin e punimeve dhe mbikëqyrësin, që t'i jepet leja për fillimin e ndërtimit, si dhe t'u mundësohet punëtorëve dhe mbikëqyrësve akomodimi, vendosja e pajisjeve në terren dhe ngritja e zyrave të tyre për ndjekjen e punimeve”, deklaroi Zekolli. Ky projekt parashikon ndërtimin e afërsisht 40 objekteve inxhinierike, ku përfshihen 5 tunele në të dyja anët, 8 ura, 11 nënkalime, 4 galeri dhe 9 mure mbajtëse anësore. Afati i parashikuar për ndërtimin e kësaj rruge është 4 vjet. Financimi i segmentit të dytë të autostradës Shkup-Bllacë mbështetet nga një kredi prej 167.6 milionë eurosh e siguruar përmes Bankës Evropiane për Rindërtim dhe Zhvillim, një grant prej 30.82 milionë eurosh nga Korniza e BE-së për Ballkanin Perëndimor, ndërsa pjesa e mbetur prej 23.58 milionë eurosh sigurohet nga buxheti i vetë Ndërmarrjes Publike “Rrugët Shtetërore”. “Jam jashtëzakonisht optimiste dhe besoj te realizimi i projektit, madje ashtu siç kemi theksuar, ai mund të kryhet edhe më shpejt. Kjo falë vullnetit politik, seriozitetit dhe vetëdijesimit për rëndësinë madhore që ka kjo vepër. Po ashtu, kemi të siguruar buxhetin total, një koordinim të shkëlqyer me realizuesin dhe mbikëqyrësin e caktuar. Si Ministri e Transportit ushtrojmë mbikëqyrje të vazhdueshme ndaj Ndërmarrjes Publike ‘Rrugët Shtetërore’ dhe nuk shoh asnjë pengesë që mund të ngadalësojë ritmin e punimeve”, shtoi Zekolli. Vetëm kostoja e projektimit ka kapur shifrën e 3.1 milionë eurove, mjete këto të siguruara nga grantet dhe të ndara për kompanitë projektuese SH.A. “Omega” dhe “Hill International”. Autostrada do të ketë një gjerësi totale prej 27.5 metrash, e cila përfshin nga dy korsi qarkullimi në secilin drejtim me nga 3.5 metra gjerësi, si dhe nga një korsi emergjente prej 2.5 metrash. Kompania “Granit” është ajo që ka fituar të drejtën e ndërtimit të këtij segmenti prej 10.5 kilometrash, pasi ka firmosur kontratën me shtetin dhe tashmë ka zbritur në terren. Vlera e përgjithshme e kontratës llogaritet në 222 milionë euro, ku përfshihet edhe shërbimi pesëvjeçar i mirëmbajtjes pas inaugurimit zyrtar të rruge, i cili pritet të bëhet në verën e vitit 2030. Ndërkohë, kujtojmë se segmenti i parë prej 2 kilometrash i autostradës Shkup-Bllacë u shoqërua me zvarritje të shumta ndër vite dhe për një kohë të gjatë mbeti i ndërtuar si një aks pa krye.