Formë e lartë e Ilirisë në Kategorinë e Parë, ja pasqyra e plotë e javës së dhjetë

Java e dhjetë e Kategorisë së Parë është përmbyllur këtë të diel me ndeshjen e zhvilluar në qytetin e Peshkopisë ndërmjet Korabit dhe Flamurtarit, e cila u mbyll pa u tundur rrjetat, duke u shndërruar në të vetmen sfidë të kësaj jave që nuk prodhoi gola. Një ditë më parë janë zhvilluar pesë takimet e tjera të kësaj i radhe kampionati, ku skuadra e Ilirisë ka konfirmuar formën e shkëlqyer, duke ruajtur kreun e klasifikimit. Formacioni i drejtuar nga trajneri Dritan Smajlaj ka regjistruar një fitore minimale në fushën e vet përballë Orikut, që mbyll renditjen. Fati i kësaj ndeshjeje u vendos që në fraksionin e parë të lojës falë një goli të realizuar nga Darnell, rezultat që e ngjit Ilirinë në kuotën e 21 pikëve pas dhjetë javësh lojë. Në krahun tjetër, Besa e ka humbur hapin e skuadrës kryesuese, pasi kavajasit nuk kanë galopuar më shumë se një barazim 1-1 në shtëpinë e tyre kundër Burrelit. Pjesa e parë i ka buzëqeshur miqve, të cilët kaluan të parët në avantajh me anë të Xhabrahimit, ndërkohë që vendasit barazuan shifrat në pjesën e dytë me anë të një penalltie të ekzekutuar saktë nga Spahiu. Te rezultatet pozitive është rikthyer edhe Bylisi, i cili ka arkivuar tri pikë me mjaft vlerë pas triumfit 2-1 në përballjen kundër Kastriotit. Ballshiotët kanë gjetur rrugën e rrjetës me anë të Rieuwai dhe Markut, duke siguruar fitoren, ndërsa për krutanët golin e vetëm e shënoi Hoxha. Një paraqitje e suksesshme është regjistruar edhe për Kukësin, që ka triumfuar në shtëpi ndaj Sopotit me rezultatin e pastër 2-0, duke u pozicionuar fuqishëm në grupin e sipërm të renditjes. Autorët e golave për skuadrën verilindore ishin Silva dhe Bespalla, duke e çuar bilancin e tyre në 18 pikë, po aq sa numërojnë edhe Bylisi e Besa. Ndërkaq, Pogradeci ka korrur një fitore tejet të rëndësishme në përballjen direkte për zonën e lartë ndaj Besëlidhjes. Goli i vetëm i takimit, realizuar nga Godswill në fraksionin e dytë të lojës, e ka ngjitur skuadrën liqenore në kuotën e 17 pikëve, ndërsa lezhianët mbesin në kuotën e 14 pikëve, duke lënë pas Flamurtarin me 16 pikë. Pas dhjetë javësh garë në këtë kampionat, tabloja e renditjes vijon me Korabin të pozicionuar në vendin e gjashtë me 12 pikë, pasuar nga Kastrioti me 11 pikë, Burreli dhe Sopoti me nga 7 pikë secili, kurse Oriku mbetet në vendin e fundit të klasifikimit me 2 pikë të grumbulluara.