Dokumentet e reja historike: Skënderbeu si Mbret i Shqipërisë dhe lidhja e gjakut me Pal Engjëllin

Studiuesi dhe historiani Gjon Keka ka bërë publike disa gjetje të rëndësishme nga kërkimet e tij në arkivat dhe bibliotekat e ndryshme evropiane, ku ka evidentuar tri vepra të rralla akademike e teologjike të shtypura në Brescia më 1677, në Linz më 1712 dhe në Dillingen më 1719. Këto materiale dëshmojnë detaje të reja për trungun familjar të Kastriotëve dhe do të jenë pjesë e botimeve të ardhshme të autorit, duke hedhur dritë mbi aspekte të panjohura deri më tani. Sipas dokumentit të Brescias të vitit 1677, që përfshin statutin e Urdhrit Kalorësiak të Shën Gjergjit, Gjergj Kastrioti dhe kryeipeshkvi Pal Engjëlli ishin kushërinj të parë, çka tregon se udhëheqja ushtarake dhe ajo diplomatike e arbërve në shekullin e XV ndaheshin brenda të njëjtit rreth familjar. Po kështu, e njëjta dëshmi zyrtare konfirmon se në qarqet evropiane dhe ato të Vatikanit, të mbështetura nga Papa Piu II, Heroi Kombëtar njihej zyrtarisht me atributin e lartë monarkik si “Mbret i Arbërisë” (Rè dell'Albania). Nga ana tjetër, shkrimet akademike nga universitetet e Linzit dhe Dillingenit sjellin në vëmendje rolin e Skënderbeut si ndërtues shteti dhe ligjvënës, duke e paraqitur atë si një figurë që reformoi rendin shoqëror përmes ligjeve të shkruara. Këto burime të reja arkivore synojnë të dokumentojnë më tej pozicionin e Arbërisë si një mbretëri e mirëfilltë e integruar në rrjedhat politike dhe juridike të Evropës së asaj periudhe.