Operacioni ndërkombëtar “The Wanted”: Ekstradohet nga Spanja 41-vjeçari i dënuar për disa vepra të rënda penale

Policia e Shtetit ka kurorëzuar me sukses një tjetër aksion të rëndësishëm në kuadër të operacionit policor ndërkombëtar të koduar “The Wanted”, duke bërë të mundur sjelljen në vend nga Spanja të një 41-vjeçari, i cili ishte shpallur kërkim ndërkombëtar për një sërë krimesh që përfshijnë pastrimin e parave, shkeljet ekonomike, armëmbajtjen pa leje dhe vepra kundër personit. Ky operacion u finalizua falë bashkëpunimit të ngushtë ndërmjet ekspertëve të Drejtorisë së Interpolit dhe autoriteteve ligjzbatuese në Madrid. Si rezultat i këtij koordinimi, nga qyteti i Barcelonës u ekstradua drejt Shqipërisë shtetasi Arnold Jaho, 41 vjeç, i cili e ka origjinën nga qyteti i Vlorës. Ndaj këtij shtetasi ekzistojnë disa vendime gjyqësore dhe masa sigurie. Më konkretisht, Gjykata e Tiranës e ka dënuar atë në vitin 2026 me 6 vite heqje lirie për akuzat e pastrimit të produkteve të veprës penale dhe fshehjes së të ardhurave, si dhe në vitin 2024 është dënuar me 1 vit burgim për veprën penale të mashtrimit. Krahas dënimeve me burg, ky person është edhe nën hetim nga organet e drejtësisë. Për të, Prokuroria e Tiranës ka lëshuar një urdhër ndalimi gjatë vitit 2025, pasi dyshohet se është i përfshirë në veprat penale të heqjes së paligjshme të lirisë, si dhe prodhimit dhe mbajtjes pa leje të armëve, armëve shpërthyese dhe municionit luftarak.