Mbretëria e Bashkuar rikonfirmon mbështetjen për Kosovën, Kurti pranon urimin nga kryeministri Burnham

Kryeministri i Republikës së Kosovës, Albin Kurti, ka pranuar një letër urimi nga kryeministri i Mbretërisë së Bashkuar, Andy Burnham, përmes së cilës është riafirmuar miqësia dhe bashkëpunimi i ngushtë mes dy vendeve. Në mesazhin e tij, kryeministri Burnham ka vënë në pah lidhjet e forta dhe partneritetin e deritanishëm ndërshtetëror, duke shprehur krenarinë për faktin se Londra zyrtare ka qenë ndër mbështetëset e para të shtetësisë së Kosovës. “Jemi krenarë që kemi qenë ndër vendet e para që e njohu pavarësinë e Kosovës. Ne mbetemi mbështetës të palëkundur të zhvillimit të vazhdueshëm të Kosovës si shtet sovran, i pavarur dhe shumëetnik, si dhe e vlerësojmë lart bashkëpunimin tonë të vazhdueshëm në promovimin e stabilitetit dhe sigurisë në Evropë”, ka deklaruar ai në letrën drejtuar kreut të ekzekutivit kosovar. Më tej, shefi i qeverisë britanike ka theksuar se vendi i tij vijon të mbetet i përkushtuar ndaj paqes rajonale, duke vlerësuar lart rëndësinë e drejtësisë ndërkombëtare, llogaridhënies dhe respektimit të ligjit si shtylla kryesore drejt një pajtimi afatgjatë. “Pres me kënaqësi të punoj me ju për të trajtuar disa nga sfidat më të mëdha të Evropës, si dhe për të zgjeruar bashkëpunimin tonë të shkëlqyer dhe partneritetin me përfitime të ndërsjella në fushat me interes të përbashkët, nga forcimi i ekonomive tona deri te luftimi i krimit të rëndë të organizuar”, ka përmbyllur letrën e tij kryeministri Burnham.