Një dekadë pa Astrit Deharin: Kërkesa për drejtësi mbetet e pandryshueshme

Në shënim të dhjetëvjetorit të ndarjes nga jeta të aktivistit Astrit Dehari, u organizua një akademi përkujtimore ku u nderua jeta dhe veprimtaria e tij. Në këtë ngjarje, kryeministri i Kosovës, Albin Kurti, bashkëpunëtorë të afërt dhe miq të Deharit, ngritën sërish zërin për zbardhjen e plotë të rrethanave të vdekjes së tij dhe vënien e drejtësisë në vend. Kryeministri Albin Kurti rikujtoi ditët e vështira të mbajtjes së Deharit në paraburgim, duke theksuar se ai qëndroi prapa hekurave për 68 ditë pa u ngritur asnjë aktakuzë, pa gjykim dhe pa u dëgjuar asnjëherë nga organet e drejtësisë. "Në qelinë A3 të burgut të Prizrenit, ai u vra. Sot, pas një dekade, ende nuk e dimë identitetin e vrasësit, ndërkohë që në këtë proces janë ndërruar pesë prokurorë", deklaroi Kurti, duke iu referuar edhe raporteve të autopsisë dhe ekspertizës së Institutit Zviceran në Lozanë, të cilat përjashtojnë tezën e vetëvrasjes. Egzon Haliti, ish-aktivist dhe mik i fëmijërisë së Deharit, vuri në pah karakterin solidar dhe thellësinë e bindjeve politike të Astritit. Sipas tij, Dehari nuk ishte vetëm një aktivist i përkushtuar, por një individ që jetonte parimet e tij në çdo diskutim dhe veprim të përditshëm. Haliti bëri thirrje që përkujtimi i Astritit të mos mbetet vetëm në suaza ceremoniale, por të shërbejë si shtysë për të mbrojtur vlerat për të cilat ai luftoi. Destan Hajdini, bashkëvendës i të ndjerit, evokoi kujtime nga angazhimi i hershëm politik i Deharit dhe rrethanat e arrestimit të tij më 13 gusht 2016. Ai nënvizoi se në ditën e 67-të të qëndrimit në paraburgim, pa asnjë aktakuzë të ngritur, jeta e Astritit u shua në mënyrë tragjike, duke lënë pas një plagë të hapur për familjen dhe shoqërinë. Në fjalën e saj, shoqja dhe bashkëaktivistja Rine Zhitia, përshkroi përkushtimin e Deharit si student i shkëlqyer i mjekësisë dhe aktivist human. Ajo theksoi se për Astritin, shëndetësia dhe politika ishin dy shtylla të së njëjtës përpjekje për të ndihmuar njerëzit. Zhitia u zotua se bashkëaktivistët do të vazhdojnë me këmbëngulje kërkimin e drejtësisë për mikun e tyre. Pas përmbylljes së akademisë, kryeministri Kurti, në shoqërinë e anëtarëve të Lëvizjes Vetëvendosje, nderoi kujtimin e Deharit duke ndezur qirinj pranë muralit të tij. Gjatë ditës, lideri i ekzekutivit, së bashku me prindërit e Astritit, Avniun dhe Xhemilen, si dhe bashkëpunëtorë të tjerë, kryen homazhe te varri i të ndjerit, duke rikonfirmuar përkushtimin për të çuar deri në fund kërkesën për zbardhjen e rastit.