Moti sot: Të mërkurën e nisin reshjet e shiut, por dita sjell ngritje temperaturash dhe intervale me diell

Gjatë orëve të para të ditës dhe përgjatë mëngjesit të së mërkurës, vendi ynë do të përfshihet nga vranësira dhe reshje lokale shiut, të cilat në zona të caktuara mund të marrin formën e rrebesheve afatshkurtra. Gjatë këtij intervali kohor ekziston mundësia edhe për ndonjë shkarkesë elektrike. Në vazhdimësi të ditës, tabloja meteorologjike do të përmirësohet duke sjellë alternime mes kthjellimeve me diell dhe vranësirave të lehta. Megjithatë, prani e reshjeve të izoluara mund të mbetet në zona të caktuara edhe gjatë orëve të mbrëmjes. Sa i përket dinamikës së erës, ajo do të fryjë nga drejtime të ndryshme. Një intensitet më i shprehur i erës parashihet të ketë në rajonin e Gjakovës, ku shpejtësia e saj kohë pas kohe do të luhatet nga 7 deri në 43 km/h. Kjo e mërkurë do të shoqërohet me një ngritje të lehtë të temperaturave në të dyja ekstremet. Vlerat minimale do të lëvizin ndërmjet 7 dhe 10°C, ndërsa ato maksimale të ditës pritet të arrijnë nga 15 deri në 19°C.