Kenan Jildiz drejt rikthimit te Juventusi: Zbardh datën e kthimit në fushë

Pas një periudhe të gjatë sfiduese, Kenan Jildiz është pranë rikthimit në aksion, duke parë më në fund dritë në fund të tunelit pas dëmtimit që e mbajti larg tapetit të gjelbër. Talenti turk është detyruar të qëndrojë larg fushave që nga fundi i muajit gusht. Shkaku i kësaj mungese ka qenë një frakturë në kockën e pestë metatarzale të këmbës së majtë, një dëmtim që e detyroi numrin 10 të Juventusit t’i ndiqte ndeshjet e skuadrës së tij vetëm nga tribunat. Megjithatë, situata ka ndryshuar për mirë. Gjatë javëve në vijim, Jildiz pritet të nisë stërvitjen në fushë për të rifituar formën e duhur fizike. Pasi dhimbjet në këmbën e majtë janë reduktuar ndjeshëm, futbollisti do të fillojë një program të rritjes graduale të ngarkesës stërvitore. Stafi mjekësor i Juventusit po ndjek një qasje tejet të kujdesshme. Askush në klub nuk dëshiron të rrezikojë një rikthim të parakohshëm që mund të shkaktonte probleme të tjera, ndaj procesi i rikuperimit do të jetë i kontrolluar deri në detajet më të vogla. Në kalendarin e rikuperimit është shënuar tashmë një datë kyçe: 14 dhjetori. Në këtë ditë, Juventusi përballet me Monzën dhe ky takim shihet si mundësia ideale për rikthimin e turkut në fushë. Rikthimi i tij pritet me entuziazëm të madh, pasi fantazia dhe aftësitë e tij individuale janë elemente që do t’i shtojnë dozat e paparashikueshmërisë dhe dinamizmit lojës sulmuese të bardhezinjve.