Liza Gashi: Kosova dëshmoi qëndrueshmëri në reforma, pavarësisht ngërçit politik

Zëvendëskryetarja e Komisionit për Integrime Evropiane, Liza Gashi, ka vlerësuar se shteti i Kosovës ka arritur të shënojë përparim në segmente të caktuara të reformave, përkundër sfidave të mëdha të shkaktuara nga bllokada institucionale. Sipas saj, Raporti i Komisionit Evropian për vitin 2026 konfirmon se nuk ka pasur regres, por vetëm një ngadalësim të ritmit të proceseve integruese. Gashi sqaroi se periudha e vlerësimit, nga 1 shtatori 2025 deri më 1 shtator 2026, është përshkuar nga një gjendje e vështirë politike, e karakterizuar nga një qeveri në detyrë, një Kuvend që nuk ka funksionuar me kapacitet të plotë dhe mungesë të theksuar të llogaridhënies së institucioneve karshi legjislativit. Lidhur me proceset zgjedhore të mbajtura gjatë këtij harku kohor, Gashi theksoi se raporti i vlerëson tri palët e zgjedhjeve si procese kredibile, të cilat kanë demonstruar pluralizëm të mirëfilltë dhe standarde të larta demokratike. Përkundër vështirësive, ajo veçoi sukseset në luftën kundër krimit të organizuar dhe përparimin në reformën e administratës publike. Duke folur për Planin e Rritjes së Bashkimit Evropian, zëvendëskryetarja Gashi rikujtoi se, megjithëse Kosova ishte ndër vendet e para që dorëzoi agjendën e reformave, ngërçi politik bëri që vendi të jetë i fundit në rajon që ratifikoi marrëveshjen ndërkombëtare në Kuvend. Megjithatë, ajo nënvizoi një arritje historike në kapitullin 31, ku për herë të parë vlerësohet linjëzimi i plotë i politikës së jashtme dhe të sigurisë së Kosovës me atë të BE-së. "Kosova është 100 për qind e linjëzuar me politikën e jashtme dhe të sigurisë të BE-së, përfshirë edhe sanksionet ndaj Rusisë dhe Bjellorusisë", deklaroi Gashi. Në fund, ajo bëri të ditur se objektivi kryesor i Kosovës mbetet marrja e pyetësorit nga Komisioni Evropian, si një hap vendimtar drejt përfitimit të statusit të vendit kandidat. Gashi theksoi se ky proces kërkon vullnet politik edhe nga ana e Bashkimit Evropian, ndërsa shtoi se Kosova duhet të vazhdojë me këmbëngulje adresimin e sfidave që po e ngadalësojnë rrugëtimin e saj evropian.