Skanim total i sektorit të qumështit: AUV nis kontrollet e rrepta nga ferma te tregu

Agjencia e Ushqimit dhe Veterinarisë (AUV) ka aktivizuar Programin e Përhershëm të Survejimit dhe Monitorimit për industrinë e qumështit. Ky hap synon kryerjen e kontrolleve sistematike dhe analizave laboratorike përgjatë gjithë zinxhirit, duke përfshirë prodhimin, përpunimin, importin dhe shitjen e produkteve të qumështit. Ky program, i hartuar në bashkëpunim me Shoqatën e Prodhuesve të Qumështit, ka për qëllim garantimin e standardeve të larta të sigurisë dhe cilësisë. Përmes kësaj nisme, AUV synon identifikimin proaktiv të çdo parregullsie apo shkeljeje ligjore që mund të rrezikojë konsumatorin. Monitorimi do të jetë gjithëpërfshirës: nga ushqimi i kafshëve dhe procesi i mjeljes në ferma, te transporti, përpunimi, paketimi dhe deri te shpërndarja përfundimtare në treg. Vëmendje e barabartë do t’u kushtohet si produkteve vendore, ashtu edhe atyre që hyjnë në tregun tonë përmes importit. Në baza mujore, ekspertët do të kryejnë analiza të detajuara fiziko-kimike dhe mikrobiologjike. Fokus i veçantë do të jetë verifikimi i përbërjes së produkteve, si niveli i yndyrave dhe proteinave, prania e vajit të palmës, përdorimi i qumështit pluhur, si dhe kontrolli për aflatoksina, mbetje antibiotikësh apo substanca të tjera të ndaluara. Gjithashtu, siguria mikrobiologjike do të jetë prioritet, me testime rigoroze për praninë e baktereve të rrezikshme si Salmonella, Listeria monocytogenes dhe Escherichia coli, për të mbrojtur shëndetin e qytetarëve. Ky operacion është pjesë e strategjisë së iniciuar nga ministri i Bujqësisë, Pylltarisë dhe Zhvillimit Rural, Armend Muja, për forcimin e mbikëqyrjes së sektorit. Ndërsa bashkëpunimi me prodhuesit synon shkëmbimin e praktikave të mira, AUV mbetet e pavarur në vendimmarrjet inspektuese dhe marrjen e mostrave. Ndryshe nga metodat e mëparshme, ky program kalon në një sistem të bazuar në vlerësimin e rrezikut, duke orientuar kontrollet te operatorët ku rreziku është më i lartë. Në rast të shkeljeve, AUV ka paralajmëruar masa drastike, duke përfshirë bllokimin e produkteve dhe sanksione ligjore ndaj operatorëve të papërgjegjshëm. Me këtë nismë, Kosova synon harmonizimin e sistemit të sigurisë ushqimore me direktivat e Bashkimit Evropian, veçanërisht me Kapitullin 12. Objektivi kryesor mbetet mbrojtja e shëndetit publik dhe sigurimi i një zinxhiri ushqimor transparent dhe të besueshëm, nga ferma deri në tryezën e çdo familjeje.