Tragjedia e vitit 2010 që trondit ende: 16 vite dyshime dhe kërkim drejtësie për vdekjen e 22-vjeçares Kosovare Kurtaj

Bedrije Kurtaj nuk ka ndalur së kërkuari të vërtetën rreth humbjes tragjike të vajzës së saj 22-vjeçare, Kosovare Kurtaj, e cila ndërroi jetë në vitin 2010 në rrethana që fillimisht u cilësuan si aksident trafiku. Edhe pas një periudhe prej 16 vitesh, ajo vazhdon të ngrejë dyshime të forta mbi mënyrën se si ndodhi ngjarja dhe pretendon se institucionet e drejtësisë nuk kanë kryer hetime të mjaftueshme për zbardhjen e plotë të rastit. Sipas nënës, dyshimet e para nisën që në fillim, kur asaj iu mohua mundësia për të parë trupin e pajetë të së bijës. Këto shqetësime u thelluan edhe më tej pas disa telefonatave misterioze që ajo pranoi pas tragjedisë. Bedrije Kurtaj shton se tash e sa kohë ka humbur çdo kontakt me personat që mund të kenë njohuri kyçe për ngjarjen, përfshirë dëshmitarin kryesor dhe ish-bashkëjetuesin e viktimës, ndërkohë që familja vazhdon të vuajë mungesën e një hetimi rrënjësor. Dokumentet mjeko-ligjore të siguruara hedhin dritë mbi detaje tronditëse nga kjo ngjarje. Raporti i autopsisë i datës 6 dhjetor 2010, vetëm dy ditë pas tragjedisë, dëshmon se Kosovare Kurtaj kishte qenë pa rroba në momentin e vdekjes. Fotografikisht dhe përmes dokumentacionit, në trupin e saj u konstatuan lëndime të shumta, nga gërvishtjet në këmbë deri te dëmtimet në vesh, ndonëse mjeku ligjor atëherë kishte dalë me përfundimin se plagët kishin ardhur si pasojë e një aksidenti rrugor. Pesë vjet pas varrimit, me kërkesë këmbëngulëse të familjarëve, trupi i së ndjerës u zhvarros për t'i nënshtruar një autopsie të dytë. Ky raport i ri, duke iu referuar edhe të dhënave emergjente të Qendrës Klinike Universitare të Kosovës (QKUK), konstatoi se Kosovarja ndodhej në shkallën e 3-të të komës sipas shkallës së Glazgout (GCS), gjendje që tregon mungesë totale të reagimit. Në kontrast të plotë me viktimën, gjendja e shoferit të automjetit ishte dukshëm ndryshe. Tek ai u regjistruan vetëm mavijosje në kraharor, në pjesën e poshtme të shpinës dhe në zonën e belit, si dhe një plagë e lehtë në veshin e djathtë. Shkalla e tij e Glazgout ishte 15 pikë, duke treguar vetëdije të plotë gjatë ekzaminimit, çka ka ngritur pikëpyetje serioze se si pasagjerja kishte përfunduar jashtë makinës. Sipas një opinioni të përbashkët të dhënë nga pesë mjekë ligjorë, lëndimet e rënda të viktimës ishin shkaktuar nga kalimi i rrotës së automjetit mbi kokën e saj. Avokati Ramë Dreshaj, i cili është angazhuar në këtë çështje, bën të ditur se ka konsultuar privatisht ekspertë të huaj. Sipas tij, pas shqyrtimit të provave, ata kanë vlerësuar se ngjarja nuk përbën një aksident të zakonshëm trafiku. Madje, avokati Dreshaj pohon se posedon edhe deklaratën e një dëshmitari okular, i cili aktualisht ka përfituar azil në Francë me arsyetimin se nuk ndihej i sigurt për të jetuar në Kosovë pas atyre që kishte parë. Ndërsa vitet kalojnë, familja Kurtaj mbetet ende në pritje të përgjigjeve përfundimtare për fatin e vajzës së lor.